Qazǵarysh Tashkenttegi ǵarysh tehnologııalary birinshi óńirlik konferentsııasyna qatysyp jatyr

TAShKENT. QazAqparat – Tashkentte 10-12 mamyr aralyǵynda Ortalyq Eýrazııa óńirinde Space Technology Conference (STC 2022) ǵarysh tehnologııalary boıynsha birinshi konferentsııa ótip jatyr. Oǵan QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń aeroǵarysh komıteti (AǴK), Qazǵarysh kásiporyn basshylary, ǵarysh salasynyń mamandary kiretin Qazaqstan delegatsııasy qatysyp jatyr, dep habarlaıdy QazAqparat tilshisi.

Ǵarysh tehnologııalary boıynsha birinshi óńirlik konferentsııaǵa qatysýshylardy «Ózbekǵarysh» bas dırektorynyń m.a. Shýkrat Qadyrov pen Ózbekstannyń aqparattyq tehnologııalardy damytý mınıstri Sherzod Shermatov qarsy aldy.

Ortalyq Eýrazııa áleýmettik-ekonomıkalyq damýynyń turaqty qozǵaltqyshy retinde ǵaryshtyq tehnologııalarǵa arnalǵan konferentsııanyń birinshi kúni QR-daǵy ǵarysh qyzmeti týraly aqparatpen QR TsDIAÓM AǴK tóraǵasy Baýbek Oralmaǵambetov bólisti.

Qazǵarysh tóraǵasy atap ótkendeı, Qazaqstan delegatsııasynyń negizgi baıandamalary «Qazaqstan Ǵarysh Sapary» UK» AQ (QǴS), «Respýblıkalyq ǵaryshtyq baılanys ortalyǵy» AQ (RǴBO) basshylary usynatyn zamanaýı spýtnıktik tehnologııalarǵa arnalady.

«Bul turǵyda bizde jaqsy jumys tájirıbesi bar jáne zamanaýı ǵarysh tehnologııalaryn damytý perspektıvalary týraly pikir almasýǵa múmkindik bar», - dep atap ótti B.Oralmaǵambetov.

«Qazaqstan Ǵarysh Sapary» UK» AQ basqarma tóraǵasy Aıdyn Aıymbetov 2014 jyldan beri jumys istep kele jatqan Jerdi qashyqtyqtan zondtaý (JQZ) Qazaqstan ǵarysh júıesiniń el úshin jumys nátıjeleri men ekonomıkalyq áseri týraly aıtyp beredi.

STC 2022 ǵarysh tehnologııalary jónindegi konferentsııaǵa qatysýshylarǵa Qazaqstannyń «Kazsat» baılanys jáne habar taratýdyń alǵashqy ulttyq spýtnıktik júıesiniń prezentatsııasyn «RǴBO» AQ basshysy Málik Júıriktaev usynady.