Qazǵarysh «KazSat-2» jerserigin basqarýdyń ekinshi rezervtik keshenin iske qosýǵa nıetti

ASTANA. 11 mamyr. QazAqparat - Qazaqstanda aǵymdaǵy jyldyń jazynda «KazSat» júıesiniń jerserikterimen basqarýdyń rezervtik jerdegi keshenin paıdalanýǵa berý josparlanǵan, dep habarlady Qazaqstan Respýblıkasynyń Ulttyq ǵarysh agenttiginiń tóraǵasy Talǵat Musabaev Rrimeminister.kz saıtyna bergen eksklıýzıvti suhbatynda.

«Biz qazir Almatynyń janynda «KazSat» serııasynyń ǵarysh apparattaryn basqarýdyń rezervtik keshenin quryp jatyrmyz, óıtkeni jerde bir keshen jetispeıdi, jáne de árqashan rezerv bolýy tıis. Bıyl shildede qurylysty aıaqtaımyz degen úmittemin», - dedi T.Musabaev.

Atalǵan keshen Aqkól qalasynda ornalasqan KazSat júıesiniń jerserikterin basqarýdyń jerdegi keshenin rezervte saqtaıdy.

Aıta ketý kerek, jumys jasap turǵan «KazSat-2» jerserigi bar jáne «KazSat-3»-ti iske qosýdy josparlanǵan «KazSat» spýtnıktik baılanys jáne habar taratý júıesi respýblıkamyzdyń barlyq aýmaǵynda baılanys jáne habar taratý máselelerin tıimdi sheshýge múmkindik beredi jáne Internet, 3G jelileri, sandyq televızııa, IP-telefonııa jáne t.b. sııaqty baılanys, kommýnıkatsııa jáne mýltımedıalyq salalaryn damytýǵa serpin beredi.

Búgingi tańda shtattyq rejımde jumys jasaıtyn jáne Qazaqstan, Ortalyq Azııa elderinde jáne Reseıdiń ortalyq bóliginde televızııalyq habar taratýdy jáne spýtnıktik baılanys júıesinde málimetter berýdi qamtamasyz etý úshin, sonymen qatar spýtnıktik baılanystyń qazaqstandyq operatorlarynyń suranysyn qanaǵattandyrý úshin «KazSat-2» jerserigi 64%-ǵa júktelgen.

Oǵan qosa, spýtnıktik resýrsty jaldaý boıynsha qyzmetter Qazaqstannyń 9 baılanys operatoryna usynylady.

Agenttik basshysy atap ketkendeı, «KazSat» spýtnıktik baılanys júıesin qurýdyń negizgi maqsaty ózara rezervtermen jáne baılanys pen habar taratýdyń ulttyq operatorlarynyń suranysyn qanaǵattandyrý úshin barlyq spýtnıktik jáne tele-radıo arqyly habar taratý jelilerin qoldaý bolyp tabylatynyn atap ótti.