«Qazfosfat» zaýyty memleketke 697 mln teńgege zalal ótedi

ASTANA. QazAqparat – «Qazfosfat» zaýyty ammofos tyńaıtqyshyn joǵary baǵamen satqan. Atalǵan fakt boıynsha tergeý júrgizildi. Bul týraly QR Básekelestikti qorǵaý jáne damytý agenttigi tóraǵasynyń orynbasary Bolat Sámetov málim etti, dep habarlaıdy QazAqparat tilshisi.

«Qazfosfat» JShS zaýytyna qatysty ammofosqa joǵary baǵa belgileý faktisi boıynsha qatysty tergeý júrgizildi. Ótken jyly qarashada ammofos baǵasynyń 125 000 teńgeden 168 750 teńgege deıin ósýi baıqaldy. Al bıyl jyl basynan beri baǵanyń ósýi 35%-dy qurady. Bıyl qańtarda ammofos baǵasy 185 625 teńgeden turdy. Osylaısha 2021 jyldyń qańtarymen salystyrǵanda baǵa 48,5%-ǵa ósken», - dedi Bolat Sámbetov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, tergeý nátıjesinde «Qazfosfat» zaýyty ammofos baǵasyn 185 myń teńgeden 173 myń teńgege tómendetti.

«Sondaı-aq, atalǵan mekeme klıentterge ammofosty satý boıynsha eski jáne jańa baǵa arasyndaǵy aıyrmashylyqty qaıtara bastady. Kásiporynnyń málimeti boıynsha baǵa aıyrmashylyǵynyń jıyntyq somasy 2,8 mlrd teńgeni qurady. Odan bólek, «Qazfosfat» zaýyty memleketke 697 mln teńge kóleminde zalal ótedi», - deıdi ol.

Buǵan deıin agenttik tóraǵasynyń orynbasary Bolat Sámetov ıAndeks.Taksı qyzmetiniń baǵasyna qatysty is sotta qaralyp jatqany týraly habarlaǵan edi.

Sondaı-aq, brıfıng barysynda «Air Astana» áýe kompanııasynyń ústinen qozǵalǵan is ákimshilik sotta qaralyp jatqany aıtyldy.