«KazEOSat jer serigi Astana tóńireginde zańsyz qoqys tastaıtyn oryndardy anyqtady» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 14 qazan, sársenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń jazýynsha, jýyrda ǵana Kókshetaýda ashylǵan Naýan Haziret atyndaǵy jańa meshit musylman qaýymyna eleýli oqıǵalar ordasyna aınalyp otyr. Solardyń basty sanatyna Qazaqstan musylmandary dinı basqarmasynda saqtaýly Ulyq paıǵambarymyzdyń (s.ǵ.s.) bir tal saqal sharıfiniń Kókshetaýdaǵy Alla úıine alyp kelinip, jamıǵat nazaryna usynylýyn aıtar edik. Igi istiń osy oblystan bastalýynyń da ózindik syry bar.

«Bul qymbat jádigerdi Aqmola oblysyndaǵy Atbasar aýdany Sa­dovyı aýylynyń turǵyny 85 jastaǵy Fatıma (sáıkestikti qara­ńyz, Paıǵambarymyzdyń kenje qyzynyń aty da Fatıma edi ǵoı) Ábdibekqyzy Daıyrova 40 jyl boıy jasyryn saqtap kelgeni, ony aldyńǵy jyly QMDB múftııatyna tapsyrǵany jóninde gazetimizde (24.05.2013 jyl) jazǵan bolatynbyz. Jurtshylyqtyń suranysy boıynsha jarty jyldan keıin Fatıma ájemizdiń ómir jolynan «Paıǵambar jádigerin júreginde saqtaǵan ana» ataýymen ocherk te jarııalaǵanbyz. Mine, osynaý qymbat jádigerdiń Múftııattyń murajaı-kórmesinde ǵana emes, jalpy el turǵyndaryna sharapat shashýyn murat sanaǵan QMDB basshylyǵynyń bastamasy barshamyzdy qýanyshqa bóleıdi», - dep jazady maqala avtory. Osy jaıynda «Paıǵambardyń saqal sharıfi Kókshetaýǵa ákelindi» atty maqaladan tolyq oqı alasyzdar.

Bas basylym «Aýyl sharýashylyǵynyń aıaq alysy jaqsy» degen taqyryppen Aýyl sharýashylyǵy mınıstri Asyljan Mamytbekovpen aradaǵy suhbatty kópshilik nazaryna usynyp otyr. «Kelissózder qorytyndysy boıynsha aýyl sharýashylyǵyn memlekettik qoldaýdyń sharalaryn aýyl sharýashylyǵy jalpy óniminen 8,5 paıyz deńgeıinde «sary sebetti» tikeleı sýbsıdııa túrinde qoldanýǵa qol jetkizildi. DSU erejesine saı bul sýbsıdııa kórsetilgen mólsherden eki ese artyq. Birinshiden, aýyl sharýashylyǵy jalpy óniminiń qunynan 8,5 paıyzǵa teń somaly ónimge baılanyssyz sharalarǵa, ekinshiden, osy ónimniń jalpy qunynan 8,5 paıyzǵa teń somaly naqty ónimge baılanysty sharalarǵa kómek kórsetilýi múmkin. Buǵan qosa, «jasyl sebet» sheńberinde memlekettik qoldaý eshqandaı shekteýsiz kórsetiletin bolady. Onyń ishinde ǵylym, konsaltıng, veterınarııa, fıtosanıtarııa, ınfraqurylymdyq jobalar, áleýmettik qamsyzdandyrý jáne ónim qunyna áser etpeıtin sharalar shektelmeıdi.

Sýbsıdııalar aýyl sharýashylyǵy jalpy óniminiń qunyna tikeleı tepe-teń bolǵandyqtan Qazaqstan úshin 8,5 paıyz salanyń damýyna memlekettik qoldaý kórsetýdegi naqty múmkindik. Ótken jyldar kórsetkendeı, aýyl sharýashylyǵynyń jalpy ónimi ár 5 jyl saıyn 2 esege artyp keledi. Sáıkesinshe, aıqyndalǵan memlekettik qoldaýdyń kólemderi osyndaı qarqynmen ulǵaıtylmaq. Bizdiń endigi mindetimiz - tolyqqandy memlekettik qoldaýdy qamtamasyz etý jáne óndiris tıimdiligin joǵarylatý maqsatynda olardy tıimdi paıdalaný», - deıdi mınıstr.

***

«Qazaqstanda óndirý tıimdi, uzaqmerzimdi suranysqa ıe ónimderdiń tizimi jasaldy». Bul týraly Prezıdent janyndaǵy Ortalyq kommýnıkatsııalar qyzmetindegi brıfıngte elimizdiń Energetıka vıtse-mınıstri Maǵzum Myrzaǵalıev málim etti, dep jazady «Aıqyn» gazeti.

Onyń aıtýynsha, Qazaqstan­nyń Dúnıejúzilik saýda uıy­myna kirýine baılanysty týyndaıtyn birqatar táýekelder bar. Sondyqtan elimiz olardyń aldyn alý úshin birlesken kásiporyndar qurý isine kirisip ketkeni belgili. - Biz osydan birneshe jyl buryn halyqaralyq kompa­nııalarmen birlesken kásiporyn qurýǵa baǵyttalǵan jumystardy bastap kettik. Bul sharalar týyndaıtyn qaýipterdiń áserin ótpeli kezeń barysynda tar­tylatyn zamanýı tehnologııalar men básekege qabiletti taýarlar jáne qyzmetter shyǵarý óndi­risin ıgerý arqasynda jeńil­detedi, - dedi Maǵzum Myrzaǵa­lıev. Osy jaıynda « Tıimdi ónimderdiń tizimi jasaldy » atty materıalda berilgen.

Bul basylymda « Jańa jobada jańalyq jeterlik» degen maqala jarııalandy. Eger salynyp jatqan turǵyn úı jarnamada pash etiletin kórkem beınesine sáıkes kelmese, ol baspanany jarnamalaýǵa tyıym salynýy múmkin. El Úkimeti qoldanystaǵy zańnamaǵa osyndaı qyzyqty ózgeris engizgeli otyr. Keshe Májiliste «Keıbir zańnamalyq aktilerge tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasynyń tusaýy kesildi. Tanystyrylym barysynda Ekono­mıkalyq reforma jáne aımaqtyq damý komıtetiniń tóraǵasy Seıtsultan Áıim­betov jańa zań jobasyndaǵy bir bapqa nazar aýdartty: - Sizder jobaǵa bylaı jazypsyzdar: «memlekettik qurylys normalary men erejelerde qarastyrylǵan kvalıfı­ka­tsııaǵa jáne jobalyq-smetalyq qujat­ta­masyna sáıkes kelmese, salynyp jat­qan, sondaı-aq iske qosylǵan turǵyn úıdiń jáne turǵynjaıdyń jarnamasyna ty­ı­ym salynady». Sáıkes kelmeıtinin kim anyqtaıdy? Eger ǵımarat jobalyq-smetalyq qujattamasyna laıyq bolmasa, ondaı qurylysqa múldem ruqsat berýge bolmaıdy! Sonda bul bap nege kerek? S.Áıimbetovtyń baılamynsha, bul norma qurylys kompanııalarynyń múd­delerin aıaqasty etedi: «Sizder osy­laısha, tutynýshylardy qorǵarsyzdar. Biraq satýshynyń múddesine nuqsan keltire­sizder ǵoı!» dedi ol. Ulttyq ekonomıka mınıstrliginiń Tutynýshylar quqyǵyn qorǵaý komı­tetiniń tóraǵasy Álıaqpar Matıshev bul normanyń búgingi ómir shyndyǵyna saı engizilip otyrǵanyn alǵa tartty.

***

Elimizdiń KazEOSat jer serigi Astana tóńireginde zańsyz qoqys tastaıtyn oryndardy anyqtady. Ǵaryshtan túsirilgen sýretterde jazyqtaǵy qoqystar aıqyn kórinip tur, dep jazady «Ekspress K» gazeti «Kýchı sgýşaıýtsıa» atty materıalynda.

«Qazaqstan Ǵarysh Sapary» UK» AQ ókili Aısha Aısarıevanyń sózinshe, ǵaryshtyq zondtaý elorda ákimdiginiń tapsyry boıynsha júrgizilgen. Zańsyz qoqys oryndary máselesi Astanada sońǵy kezde ózekti bolýda. Keıbir jeke kompanııalar qoqys shyǵarýda qarjylaryn únemdeý úshin qaldyqtardy jazyqqa tastap ketýde ádetke aınaldyrǵan kórinedi.