KazEOSat-1 spýtnıginiń ǵaryshtaǵy alǵashqy sýretteri

ASTANA. QazAqparat - 2014 jyly 30 sáýirde Kýrý ǵarysh aılaǵynan ushyrylǵan jerdi qashyqtyqtan zondtaý (JQZ) qazaqstandyq spýtnıgi 3 mamyrda ǵaryshta túsirgen alǵashqy sýretterin joldady.

QR Ulttyq ǵarysh agenttiginiń tóraǵasy Talǵat Musabaev habarlaǵandaı, KazEOSat-1 spýtnıgi qalypty rejımde jumys isteýde. Úshinshi táýlikte ǵarysh apparaty Qazaqstannyń ǵaryshtaǵy alǵashqy sýretterin joldady.

«Sýretterdiń sapasy joǵary, Astananyń da sýreti túsirilgen», - dedi T. Musabaev.

Qazaqstannyń Ulttyq ǵarysh ortalyǵynda jasalyp jatqan jańa UBO qazaqstandyq spýtnık túsirgen ǵaryshtaǵy sýretterdi qabyldaý men óńdeýge qatysty. «Qazaqstan Ǵarysh Sapary» UK» AQ ınjenerleri orbıtadaǵy KazOESat-1 táýlik boıy baqylaýda.

«Qazaqstan Ǵarysh Sapary» UK» AQ prezıdentiniń mindetin atqarýshy Marat Nurǵojın habarlaǵandaı, spýtnık orbıtada 4 aı boıy synalmaq. Keıin ol tapsyrýshynyń - «Qazaqstan Ǵarysh Sapary» UK» AQ basqarýyna beriledi.

«KazEOSat-1» JQZ dáldigi joǵary alǵashqy qazaqstandyq spýtnıgin (Kazakhstan Earth Observation Satellite - qazaqstandyq jerdi baqylaý spýtnıgi) «Qazaqstan Ǵarysh Sapary» UK» AQ tapsyrýymen Airbus Defence and Space (burynǵy ataýy EADS Astrium) frantsýz kompanııasy daıyndaǵan.

KazEOSat-1 bolashaqtaǵy tabıǵı apattardy boljaý, jer kadastryn uıymdastyrý, eldiń qaýipsizdigin saqtaý maqsatynda Jerdi qashyqtyqtan zondtaýdyń barlyq qyzmetin, Qazaqstan Respýblıkasy aýmaǵynyń sýretterin alýǵa, monıtorıng jasaý úshin jerdiń ózge terrıtorııasynyń sýretterin alýǵa arnalǵan spýtnık.