«QazAzot» 2018 jylǵa deıin mıneral tyńaıtqyshtar óndirisiniń qýattylyǵyn arttyrmaq (FOTO)

ASTANA. QazAqparat - «Qazaqstannyń Damý Banki» AQ Aqtaý qalasynda «QazAzot» JShS-nyń mıneraldy tyńaıtyqyshtar óndirý zaýytyn keshendi jetildirý jobasyn qarjylandyrýdy bastady, dep habarlady banktiń baspasóz qyzmetinen.

Jobanyń jalpy quny 56 mlrd teńgeden astam somany quraıdy, qajetti qarajattyń 72,3%-yn QDB ulttyq valıýtadaǵy nesıe túrinde 10 jylǵa deıingi merzimge usynady. Joba 2015-2019 jyldarǵa arnalǵan Qazaqstandy ındýstrııalyq-ınnovatsııalyq damytý jónindegi Memlekettik baǵdarlamasy sheńberinde júzege asyrylady.

Jobaǵa 2018 jylǵa deıin ammıak pen azotty mıneraldy tyńaıtqyshtar óndirisiniń qýattylyǵyn 300 000 tonnadan 400 000 tonnaǵa deıin arttyryp, kásiporynnyń negizgi aktıvterin jańǵyrtý kiredi.

Keshendi jetildirý shıkizatty óndirý men óńdeýden bastap daıyn ónimdi ótkizýge deıingi tolyq óndiris tsıklyn qurýdy kózdeıdi.

Jobaǵa «Shaǵyrly-Shómishti» gaz ken ornyn ıgerý, gazdy-porshendi elektr stantsııasynyń, tankti jáne úrlemeli gazdan shyǵatyn ammıakty kádege jaratý qondyrǵysynyń, túıirshikteý munarasynyń qurylysy kiredi.

Zaýyt tolyq jobalyq qýattylyǵyn iske qosqannan keıin, aýyl sharýashylyǵynda jáne ken óndirý kásipornynda paıdalanýǵa shyǵarylatyn ónimniń 60%-na deıingi kólemi ishki naryqqa jetkiziledi, qalǵan 40%-y eksportqa shyǵarylatyn bolady.