«QazAvtoJolǵa» habar tússe, barar edi - ákimdik ókili Aqtóbedegi avtobýs órti týraly

AQTÓBE. QazAqparat - Samara-Shymkent tasjolynda Ózbekstan azamattary avtobýsta tirideı janyp ketkennen keıin «QazAvtoJol» qutqarýshylardyń telefon nómirleri kórsetilgen kartalardy úlestire bastady. Sondaı-aq atalmysh kúre joldaǵy kólik oqıǵalaryna áreket etý kúsheıtilip, 7-8 jolaýshylar avtobýsy qutqaryldy, dep habarlaıdy QazAqparat tilshisi.

Aqtóbe óńirlik kommýnıkatsııalar qyzmetinde joldaǵy qaýipsizdik pen jol qurylysy taqyrybyna arnalǵan baspasóz máslıhaty ótti. Joldardyń qurylysy týraly baıandaǵan Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev Ózbekstan azamattary mingen avtobýs órtine qatysty birneshe mán-jaıdy aıtyp berdi.

«Avtobýs órtinen soń jedel túrde komıssııa qurylǵany belgili. Sol oqıǵadan beri «QazAvtoJol» mekemesi jylytý beketteri, demalý jáne kólikke tehnıkalyq qyzmet kórsetý oryndary, sondaı-aq qutqarýshylardyń telefondary jazylǵan arnaıy karta taratýdy qolǵa aldy. Qaıǵyly oqıǵadan keıin de jolaýshylar mingen avtobýstardan habarlama túsip, kómek kórsetildi. Barlyǵy 7-8 avtobýsqa kómek berildi. Al «qaıǵyly oqıǵa kezinde kómek barmady» degen aqparatqa naqty jaýap bere almaımyn. Bir anyǵy - tótenshe jaǵdaılar qyzmetine, «QazAvtoJol» mekemesine habar tússe, olar mindetti túrde kómek kórsetedi. Avtobýs órtengen jerden 10 shaqyrym qashyqtyqta arnaıy dıspetcherlik beket boldy. Olarǵa habar tússe, barar edi. «Habar túsip, barmaı qaldy» degendi estimedim», - dedi Aıazbaı Osmanǵalıev.

Eske salsaq, 18 qańtar kúni Samara-Shymkent tasjolynda Ózbekstan azamattary mingen avtobýs órtenip, 52 adam janyp ketken bolatyn.

Qaıǵyly oqıǵaǵa baılanysty úkimetaralyq komıssııa qurylyp, ol áli jalǵasýda. Qazir avtobýstyń úsh júrgizýshisi ýaqytsha tergeý ızolıatorynda otyr.

Olarǵa qatysty 24 naýryzǵa deıin kúzetpen ustaý túrindegi bultartpaý sharasy sanktsııalandy.