«QazAvtoJol» UK» AQ fılıaly quny 2,3 mlrd teńge bolatyn kelisimshartty tendersiz jasaǵan

Kókshetaý kólik prokýratýrasy «QazAvtoJol» UK» AQ Aqmola oblystyq fılıalynda Esil ózeni arqyly ótetin kópirdiń apatty túrindegi tótenshe jaǵdaıyna silteme jasaı otyryp konkýrs ótkizbesten zańsyz shart jasasý faktisin anyqtaǵan.

Bul týraly QazAqparat elimizdiń bas kólik prokýratýrasynyń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, osy mámile boıynsha 2,3 mlrd teńge somasyna «Jaqsy-Esil-Buzylyq» respýblıkalyq mańyzy bar avtojolyna kúrdeli jóndeý júrgizýmen qatar jańa kópir salý josparlanǵan.

Degenmen kópir tez arada shuǵyl aralasýdy qajet etip, básekelestik protsedýralarǵa kedergi keltiretin basqa kúsh pen tehnologııalyq buzýshylyqtar bolǵandyǵy anyqtalmady.

Shart sheńberinde fılıal merdigerdiń shotyna 200 mln teńge kóleminde avans aýdarǵan, alaıda qandaı da bir jumys bastalmaǵan.

Osy jaǵdaılardyń barlyǵyn rastaǵan aýdıtorlardyń 2022 jylǵy 13 jeltoqsandaǵy qorytyndysymen merdiger kelispeı, sotqa shaǵymdandy.

Sot bıylǵy 30 mamyrda qaraý nátıjesinde ishki aýdıttiń qorytyndysyn (esebin) jaramsyz dep taný týraly talapty qanaǵattandyrýdan bas tartqan.

Sot aktisi 2023 jyldyń 23 tamyzynda kúshine engen.

«Fılıaldyń laýazymdy tulǵalarynyń is-áreketterine quqyqtyq baǵa berý úshin QR Qylmystyq kodekstiń 189-babynyń 4-bóligi boıynsha bótenniń senip tapsyrǵan múlkin jymqyrǵany úshin sotqa deıingi tergep-tekserý bastaldy»,-delingen Bas kólik prokýratýrasynyń baspasóz qyzmeti taratqan aqparatta.