QazAvtoJol qyzmetkeri jumysyn atqaryp júrip qaza tapty

<p>QYZYLORDA. KAZINFORM — QazAvtoJol mamany qyzmettik mindetin atqarý kezinde qaza tapty. </p>

10 aqpan 14:00 shamasynda Samara-Shymkent avtojolynyń 1285-shaqyrymynda qaıǵyly oqıǵa boldy.

Jol-kólik oqıǵasynyń (jol boıynda turǵan kólikti soqqan) saldarynan tikeleı qyzmettik mindetin oryndaý kezinde QazAvtoJol Qyzylorda oblystyq fılıalynyń bas mamany Saqtapbergen Baqytjanuly Sydyqov qaıtys boldy.

Oqıǵa «Samara-Shymkent» avtojolynda Aral aýdany, Sazdy aýyly mańynda qozǵalys qaıta jandanǵan ýaqytta bolǵan.

Qatty jyldamdyqpen kelgen Toyota Alphard kóligi jol boıynda toqtap turǵan kólikke soqtyǵysqan, sol ýaqytta avtokólik ishinde kompanııa qyzmetkeri jumys istep otyrǵan.

Ol tilge kelmesten sol jerde jan tapsyrdy.

Marqum Qyzylorda oblystyq fılıalynyń bas mamany bolyp, kompanııada 6 jyldan astam jumys istep, ózin adal, kásibı qyzmetker retinde tanytty.

Saqtapbergen Sydyqovtyń artynda tórt balasy men jary qaldy.

«QazAvtoJol» UK» AQ marqumnyń artynda qalǵan otbasyna kompanııa tarapynan búkil qajetti qarjylyq qoldaý kórsetiletinin jetkizdi.