«QazAvtoJol» AQ Aqtóbedegi jantúrshigerlik kólik apaty kezindegi jol jaǵdaıyn aıtty

<p>AQTÓBE. KAZINFORM &mdash; Jol-kólik apaty kezinde Aqtóbe-Astrahan tasjoly ashyq bolǵan. Al Lada Largus kóliginiń júrgizýshisi jol erejesin buzyp, qarsy baǵytqa shyǵyp ketken.</p>

«QazAvtoJol» UK» AQ-y Aqtóbe-Astrahan tasjolyndaǵy jol-kólik apatyna qatysty óz boljamyn aıtty. 

— Aldyn ala aqparat boıynsha Lada Largus avtokóliginiń júrgizýshisi jol júrý erejesiniń 9.1 pýnktin buzyp, qarsy baǵyttaǵy jolaqqa shyqqandyqtan Toyota Hilux avtokóligine soǵylǵan. Jol-kólik apatynda Lada kóliginde bolǵan 8 adam til qatpastan kóz jumdy. Ekinshi kóliktiń júrgizýshisi men jolaýshylary Qandyaǵash qalasynyń aýdandyq aýrýhanasyna jetkizildi. Jol apaty bolǵan sátte kúre joldyń jabyny taza bolǵan, kórinis shektelmegen. Qajetti jol belgileriniń barlyǵy ornatylǵan, — dep habarlady «QazAvtoJol» UK» AQ.

Áleýmettik jelige taraqan vıdeodan janyp ketken jeńil kóliktiń gazben júretini belgili boldy. 

Eske salsaq, Aqtóbe-Astrahan tasjolynda jol apaty kezinde bir kólik janyp ketti. Onda 8 adam kóz jumdy. Qaza tapqan adamdardyń tórteýi bala.