«QazAvtoJol» 2025 jyly jóndeýden ótetin respýblıkalyq joldardy atady

<p>ASTANA. KAZINFORM&nbsp;&mdash; &laquo;QazAvtoJol&raquo; UK&raquo; AQ Basqarma tóraǵasy Darhan Imanashev bıylǵy jyldy qorytyndylap, keler jyly qansha shaqyrym jol jóndeletinin aıtty.</p>

Onyń sózinshe, 2024 jyl elimizdiń jol-kólik salasy úshin mańyzdy boldy. Jol-qurylys maýsymy aıasynda respýblıkalyq mańyzy bar 8700 shaqyrym jolda túrli jóndeý jumystary atqaryldy.

— 3100 shaqyrym jolda qurylys pen qaıta jańartý júrgizilip, onyń 2000 shaqyrymynda negizgi jumystar aıaqtalyp, kólik qozǵalysy berildi. Qazaqstan úshin mańyzdy «Qaraǵandy-Balqash-Almaty», «Atyraý — RF shekarasy (Astrahanǵa), «Aqtóbe — Qandyaǵash» jáne «Taldyqorǵan — Óskemen» kúre joldarynyń jobasy aıaqtaldy. Kúrdeli jóndeýden uzyndyǵy 600 shaqyrymdy quraıtyn respýblıkalyq mańyzy bar joldardyń 29 nysany ótti. Ortasha jóndeýmen uzyndyǵy 5000 shaqyrym bolatyn 217 nysan qamtylyp, onyń 1217 shaqyrymy nemese 68 nysany aıaqtalyp, qoldanysqa berildi. 1143 myń sharshy metrde aǵymdaǵy jóndeý jumystary júrgizildi, — dedi Imanashev.

«QazAvtoJol» basshysy kelesi jyly 8254 shaqyrym jolda túrli jóndeý jumystary júrgiziletinin atap ótti.

— 2025 jyly aldymyzǵa úlken maqsattardy qoıyp otyrmyz. 8254 shaqyrym jolda túrli jóndeý jumystary júrgiziledi, onyń ishinde 994 shaqyrymda qaıta jańartý, 390 shaqyrymda kúrdeli jóndeý jáne 6900 shaqyrymda ortasha jóndeý. «Jezqazǵan — Qaraǵandy», «Saryaǵash q. aınalma joly», «Rýdnyı q. aınalma joly», «Aqtóbe — Ulǵaısyn», «Qyzylorda q. aınalma joly», «Túrkistan q. aınalma joly», «Beıneý — Bozoı — Shalqar» jáne «Qyzylorda — Sekseýil» mańyzdy jobalardyń qurylysyna erekshe kóńil bólinbek, — dedi ol.

Basqarma tóraǵasy jol salasynda qyzmet atqaryp jatqan barlyq mamandarǵa alǵys aıtty.

— Jol salasynda qyzmet atqaryp jatqan barlyq mamandarǵa alǵysymdy bildiremin. Sizderdiń qajyrly eńbekterińizdiń arqasynda elimizde mańyzdy jobalardyń qurylysy aıaqtalyp, halyq ıgiligine myńdaǵan shaqyrym jol berildi. Sizderdiń atqaryp otyrǵan jumystaryńyzdyń nátıjesinde respýblıkamyzdyń jol salasy damyp, ár azamatqa qolaıly ári qaýipsiz qozǵalys qamtamasyz etilýde. Qurmetti otandastar, keler jyl halqymyzǵa berekeli jyl bolsyn. Barshańyzǵa zor densaýlyq pen tabys tileımin. Jańa jyldaryńyzben!, — dep quttyqtaýyn joldady Darhan Imanashev.

Aıta keteıik, osyǵan deıin «QazAvtoJol» joldyń taıǵaqtyǵyna shaǵymdanǵan júrgizýshilerge jaýap bergenin jazdyq.