Qazatomónerkásip ýran óndirý kólemin qysqartady

ASTANA. QazAqparat - Tabıǵı ýran óndirisindegi álemdik kóshbasshy «Qazatomónerkásip» UAK» AQ óziniń óndiris deńgeıin naryqtaǵy suranysqa sáıkes keltirý maqsatynda, jer qoınaýyn paıdalaný kelisimsharttary boıynsha josparlanǵan óndiris aýqymyn 20% qysqartatynyn málim etti, dep habarlaıdy QazAqparat.

Kompanııa baspasóz qyzmetiniń málimetinshe, josparly qysqartý 2018 jyldyń qańtar aıynan bastap iske engizilip, úsh jylǵa sozylady. Nátıjesinde, jalpy alǵanda, úsh-jyldyq merzimde Qazaqstandyq ýran óndirisi shamamen 11 myń tonnaǵa qysqarmaq. 2018 jyly shamamen 4 myń tonnaǵa kem ýran óndirilýi kútilýde, bul kórsetkish «UxC» (4 - shi toqsan UMO esebi) 2018 jylǵa boljaǵan álemdik ýran óndirisi aýqymynyń 7,5 % quraıdy.

Qazatomónerkásip bul sheshimi jóninde barlyq negizgi satyp alýshylaryna habarlap, atalǵan is-sharalar ónim jetkizý kelisimderine keri áserin tıgizbeıtinin rastady.   

«Qazirgi naryqtaǵy jaǵdaıǵa sáıkes, sondaı-aq tabıǵı ýran naryǵyndaǵy ónim usynysynyń turaqty artyqshylyǵyn eskere otyryp, biz óndiris aýqymyn suranysqa ıkemdep qysqartý jónindegi strategııalyq sheshimdi qabyldadyq. Atalǵan is-sharalar bizdiń ýran óndirisiniń uzaqmerzimdi turaqtylyǵyn qamtamasyz etý boıynsha ustanymymyzdy kórsetedi, sebebi ýran óndirý dúnıe júzindegi kómirqyshqylynsyz, taza elektr energııa óndirýdiń mańyzdy elementi bolyp tabylady», dedi «Qazatomónerkásip» UAK» AQ Basqarma tóraǵasy Ǵalymjan Pirmatov.