«Qazatomónerkásip» ulttyq atom kompanııasyna - 20 jyl
Basqarma tóraǵasy Asqar Jumaǵalıev áriptesterin quttyqtap, sóz sóıledi, dep habarlaıdy atalmysh kompanııanyń Qoǵammen baılanys departamenti.
«1997 jylǵy 14 shilde kúni Memleket basshysy Qazatomónerkásipti qurý týraly Jarlyqqa qol qoıdy. Osy ýaqyt ishinde atqarylǵan qyrýar jumystardyń nátıjesinde Qazaqstan ýran óndirisi jóninen álemdik kóshbasshyǵa aınaldy. Búginde qazaqstandyq ýran dúnıejúzilik atom energetıkasy suranysynyń shamamen 40% qamtamasyz etip otyr. Jańa onjyldyqqa jasaǵan úlken josparlarymyz bar. Óndiristi ártaraptandyrýǵa túbegeıli bet buryp, ıadrolyq otyn shyǵaratyn zaýyt qurylysyn bastadyq. Kompanııa ekonomıka men eldegi áleýmettik turaqtylyqty nyǵaıtýǵa baǵyttalǵan birqatar mańyzdy mindetterdi júzege asyryp keledi. Osynyń barlyǵy Qazatomónerkásiptiń kóp sandy ujymynyń eren eńbeginiń jemisi. Bul - bizdiń ortaq tabysymyz!», - dedi ulttyq atom kompanııasynyń basshysy.
Qazatomónerkásiptiń 20 jyldyǵyn merekeleý aıasynda enshiles kásiporyndardyń 2400-deı qyzmetkeri túrli nagradalarǵa usynyldy. Kompanııanyń órkendeýine eleýli úles qosyp júrgen mamandar «Qazatomónerkásiptiń qurylǵanyna - 20 jyl», «Atom salasynyń úzdigi» mereıtoılyq belgilerimen, Energetıka mınıstrliginiń, «Samuryq-Qazyna» qorynyń, «Kazenergy» qaýymdastyǵy jáne «Qazatomónerkásip» kompanııasynyń qurmet gramotalary jáne alǵys hattarymen marapattaldy.
Qazatomónerkásiptiń mereıtoıy Astana EKSPO-2017 kórmesi aýmaǵyndaǵy «Atom energııasynyń álemi» pavılonynda da merekelendi. Munda naǵyz tsırktik qoıylym bolyp, kórmege kelýshiler aldynda akrobattar men mýzykanttar óner kórsetti, al eń belsendi qatysýshylar mereıtoı ıesiniń syılyqtaryn aldy.
«Qazatomónerkásip» UAK» AQ - Qazaqstannyń ýran jáne onyń qosyndylaryn, sırek metaldar, atom elektr stantsııalaryna arnalǵan ıadrolyq otyn, arnaıy qural-jabdyqtar, tehnologııalar eksportymen aınalysatyn ulttyq operatory. Kompanııa qyzmetiniń basty baǵyttary - geologııalyq barlaý, ýran óndirisi, ıadrolyq otyn tsıkly ónimderin óndirý jáne konstrýktsııalyq materıaldar óndirisi. Búgingi tańda kompanııada 26 000-nan astam adam eńbek etedi. Qazatomónerkásip álemniń jetekshi ýran óndirýshi kompanııalarynyń kóshin bastap keledi.