«Qazatomónerkásip» Rýmynııanyń Atom elektr stantsııasyna ýran jetkizdi

ASTAN. QazAqparat – «Qazatomónerkásip» ulttyq kompanııasy» AQ Rýmynııa zaýytyna tabıǵı ýran jetkizdi, dep habarlaıdy QazAqparat qazaqstandyq kompanııaǵa silteme jasap.

«Qazatomónerkásip» ulttyq atom kompanııasy» AQ Societatea Natională «Nuclearelectrica» S.A. («SNN») energııa kompanııasyna tabıǵı ýran kontsentrattaryn jetkizý sátti júzege asyrylǵanyn habarlaıdy», - delingen málimette.

SNN – elektr energetıkasy jáne jylýmen jabdyqtaý salasyndaǵy Rýmynııanyń memlekettik kompanııasy. Ol ıadrolyq otyn óndirýmen aınalysady, sondaı-aq kompanııa Rýmynııada energııa óndirýdiń shamamen 20% qamtamasyz etetin Chernavodsk atom elektr stantsııasynyń operatory bolyp tabylady.

«2022 jylǵy jeltoqsanda Qazatomónerkásip Rýmynııanyń atom energetıkasynyń qajettilikteri úshin ýran totyǵyn jetkizýge arnalǵan SNN ashyq tenderiniń jeńimpazy tanyldy. Kelisimshart talaptaryna sáıkes kompanııa tabıǵı ýrandy SNN zaýytyna deıin jetkizdi. Qazatomónerkásip óz ónimderin Transkaspıı halyqaralyq kólik baǵyty (THKB) arqyly eksporttady, ony kompanııa 2018 jyldan beri belsendi paıdalanyp keledi.

Qazatomónerkásip álemdik ıadrolyq otyn naryǵyndaǵy senimdi ári artyqshylyqqa ıe jetkizýshi retinde ónim jetkizý geografııasyn ártaraptandyrý jáne jańa ótkizý naryqtaryna shyǵý jónindegi jumysyn jalǵastyra beredi», - delingen «Qazatomónerkásip» Ulttyq kompanııasynyń habarlamasynda.