«Qazatomónerkásip» ótken jyly 220 mlrd teńge tabys tapty

NUR-SULTAN. QazAqparat – «Qazatomónerkásip» ulttyq kompanııasynyń basqarma tóraǵasy Májıt Sháripov 2021 jyldyń negizgi kórsetkishterin baıandady, dep habarlaıdy QazAqparat tilshisi.

«Qazirgi qubylmaly jaǵdaıǵa qaramastan 2021 jyly Qazatomónerkásip jaqsy nátıje kórsetti. 2021 jyly shoǵyrlandyrylǵan túsim 2020 jylmen salystyrǵanda 18%-ǵa ulǵaıyp, 691 mlrd teńgeni qurady. Bul negizinen spot baǵasynyń ósýine jáne teńgeniń AQSh dollaryna qatysty álsireýine baılanysty satýdyń ortasha baǵasynyń ósýi esebinen jáne ótken jylmen salystyrǵanda satý kóleminiń azdap ulǵaıýyna baılanysty boldy», - dedi M. Sháripov kompanııanyń 2021 jylǵy jumys qorytyndylary týraly baspasóz máslıhatynda.

Onyń aıtýynsha, 2021 jyly taza paıda 2020 jylmen salystyrǵanda 10%-ǵa ulǵaıyp, 220 mlrd teńgeni quraǵan.

Ýran óndirisiniń kólemi ótken jylmen salystyrǵanda 12%-ǵa ulǵaıyp, 100 paıyzdyq negizde 21 819 tonnaǵa jetken.

2021 jyly pandemııa búkil óndiris tizbegine áser etip, bul negizgi materıaldar men jabdyqtardyń jetispeýine ákep soqty.

Sondaı-aq ken oryndaryn ıgerý men óndirý kestelerine tıgen teris áserden 2021 jylǵa arnalǵan boljamdarǵa qatysty kórsetkishter tómendegen.

«2021 jyly shoǵyrlandyrylǵan satý kólemi 2020 jylǵy kólemge uqsas boldy. Ýrannyń spottyq baǵasynyń ósýi jáne teńgeniń AQSh dollaryna qatysty álsireýi arqyly toptyń ortasha satý baǵasy 2021 jyly 1 kılogramm úshin 36 677 teńgeni (bir fýnt úshin 33,11 AQSh dollaryn) qurady, bul 2020 jylmen salystyrǵanda 16%-ǵa joǵary», - dedi M. Sháripov.

Buǵan deıin M. Sháripov Reseı men Ýkraına qaqtyǵysy «Qazatomónerkásip» ulttyq kompanııasynyń qyzmetine aıtarlyqtaı áser etpegenin aıtqan edi.