«Qazatomónerkásip» kompanııasy top-menedjerleriniń qamaýǵa alynýyna qatysty túsinikteme berdi

ASTANA. QazAqparat - «Qazatomónerkásip» UAK» AQ qarjy polıtsııasynyń 1,3 mlrd. teńgeni jymqyrdy degen kúdikpen «Qazatomónerkásip-Demeý» JShS-nyń atqarýshy dırektory V.Shevelev pen onyń orynbasary S.Ábdirázaqovty qamaýǵa alý faktisi boıynsha málimdeme jasady. Málimdeme kompanııanyń resmı saıtynda berilgen.

«Qamaýǵa alý kezinde Valerıı Shevelev «Qazatomónerkásip» UAK» AQ alternatıvti energııa kózderin damytý basqarmasynyń bastyǵy bolǵan. Serik Ábdirázaqov 2013 jyldyń qazan aıynan bastap «Qazatomónerkásip-Demeý» JShS dırektorynyń qarjy boıynsha orynbasary qyzmetinen bosatylǵan», delingen habarlamada.

Kompanııada atap ótilgendeı, 2009 jyly «Qazatomónerkásip» UAK» AQ Basqarmasy qurylysy 2006 jyly bastalǵan tehnologııalyq kúrdeli áleýmettik jobany aıaqtaý taraly sheshim qabyldaıdy. 2009 jyly joba operatory bolyp «Qazatomónerkásip-Demeý» JShS belgilendi. 2011 jyldan bastap V.Shevelev atalǵan jobaǵa jaýapty bolyp taǵaıyndaldy.

2010 jyly jobany tolyǵymen aıaqtaý úshin «Qazatomónerkásip-Demeý» JShS bekitilgen smetalyq qunǵa sáıkes, «Syrdarııa-joba Qurylys» JShS-men qurylys-montajdaý jumystaryn júrgizý boıynsha kelisim jasasady.

2012 jyldyń qazan aıy jáne 2013 jyldyń shilde aıy aralyǵynda «Syrdarııa-joba Qurylys» JShS kelisimsharttaryn júıeli túrde buzyp kelgen.

«Osyǵan oraı, 2013 jyldyń shilde aıynda «Qazatomónerkásip» UAK» AQ bastamasymen «Qazatomónerkásip-Demeý» JShS QR Ekonomıkalyq qylmysqa jáne sybaılas jemqorlyqqa qarsy kúres agenttigine (qarjy polıtsııasy) «Syrdarııa-joba Qurylys» JShS qyzmetine qoldanystaǵy zańǵa sáıkes tekseris júrgizip, merdiger kásiporynǵa qatysty tıesili sharalar qoldaný týraly aryz jazady», delingen habarlamada.

2013 jyldyń jeltoqsan aıynda «Syrdarııa-joba Qurylys» JShS-men kelisim buzylady, tergeý oryndary keltirgen shyǵyn kólemin anyqtaıdy.

Aıta keterlik jáıt, qurylys-montaj jumystary «Syrdarııa-joba Qurylys» JShS tarapynan bank kepildigimen qamtamasyz etilgen.