Qazatomónerkásip kásiporyndary ShQO-ǵa 3 mıllıard teńge bóledi

ASTANA. QazAqparat - Óskemen qalasynda «Qazatomónerkásip» kompanııasy, «Úlbi metallýrgııalyq zaýyty» AQ jáne Shyǵys Qazaqstan oblysynyń ákimdigi arasyndaǵy yntymaqtastyq týraly memorandýmǵa qol qoıyldy, dep habarlaıdy «Qazatomónerkásip» UAK» AQ baspasóz qyzmeti.

Memorandýmǵa ekonomıka men áleýmettik salany odan ári damytýǵa, turǵyndardyń ál-aýqatyn arttyrýǵa baǵyttalǵan aımaqty áleýmettik-ekonomıkalyq damytý salasyndaǵy taraptardyń yntymaqtastyǵy arqaý bolǵan.

Memorandýmǵa qol qoıý rásimine «Qazatomónerkásip» UAK» AQ basqarma tóraǵasy Asqar Jumaǵalıev pen Shyǵys Qazaqstan oblysynyń ákimi Danıal Ahmetov qatysty.

Qujatqa sáıkes, ÚMZ óńirdi áleýmettik-ekonomıkalyq damytý is-sharalaryna belsendi qatysatyn bolady. Osy maqsatta zaýyt 2017-2019 jyldary oblys bıýdjetine 3 mlrd teńge aýdarady, oǵan qosa, ınvestıtsııalyq jobalar sheńberinde jańa jumys oryndaryn ashady.

Qazatomónerkásiptiń enshiles kásiporny sanalatyn Úlbi metallýrgııalyq zaýyty qazirgi kezde Shyǵys Qazaqstan oblysynda birqatar ınvestıtsııalyq jobalardy ise asyryp keledi. Solardyń qatarynda jylyna atom reaktorlaryna arnalǵan 200 tonna jylý bólgish quramalar shyǵaratyn qýatqa ıe óndiris te bar.

Memorandým sheńberinde ákimdik Úlbi metallýrgııalyq zaýyty qyzmetkerlerin kásibı daıyndaý, qaıta daıyndaýdan ótkizý jáne olardyń biliktiligin arttyrýdy uıymdastyrýǵa yqpal jasamaq.

Sol kúni «Qazatomónerkásip» kompanııasy men D. Serikbaev atyndaǵy Shyǵys Qazaqstan memlekettik tehnıkalyq ýnıversıteti arasyndaǵy ǵylymı-tehnıkalyq yntymaqtastyq týraly kelisimge qol qoıyldy.

Kompanııa basshysy Asqar Jumaǵalıev pen ýnıversıtet rektory Jasulan Sháımerdenov atom salasy jáne balama energetıkadaǵy irgeli jáne qoldanbaly zertteýler, óndiristi ártaraptandyrý maqsatynda sırek jáne sırek jer metaldar alý jáne óńdeý, ulttyq atom kompanııasy úshin kadrlar daıarlaý salasyndaǵy birlese atqarar jumystardy kelisip aldy.