Qazatomónerkásip byltyr eńbekti jáne qorshaǵan ortany qorǵaýǵa 9 mlrd teńge jumsaǵan

ASTANA. QazAqparat - Astanada ótken jyl saıynǵy keńeste «Qazatomónerkásip» UAK» AQ kásiporyndarynyń 2017 jylǵy eńbekti jáne qorshaǵan ortany qorǵaý, radıatsııalyq jáne ıadrolyq qaýipsizdikti qamtamasyz etý máseleleri boıynsha atqarǵan jumystarynyń qorytyndysy shyǵaryldy, dep habarlaıdy QazAqparat.

Jıynǵa kompanııanyń enshiles jáne táýeldi uıymdarynyń, sondaı-aq múddeli memlekettik jáne jergilikti atqarýshy organdardyń ókilderi qatysty.

«Kompanııamyz tabıǵı ýran óndirý boıynsha álemde kóshbasshy oryndy ıelenip otyr. Biz álemdik naryqqa ıadrolyq otyn jetkizý salasynda kóshbasshy bolýǵa talpynamyz, bul bárimizge úlken jaýapkershilik júkteıdi. Sondyqtan óndiristegi qaýipsizdikke, eńbekti qorǵaýǵa, adamdardyń densaýlyǵy men qorshaǵan ortaǵa aıryqsha mán beremiz. Bul qaýipsizdikke aıryqsha oryn berilgen bizdiń korporatıvtik qundylyqtarymyzben de úılesim tabady», - dedi «Qazatomónerkásip» UAK» AQ-nyń Basqarma tóraǵasy Ǵalymjan Pirmatov.

«Qazatomónerkásip» UAK» AQ 2017 jyly eńbekti jáne qorshaǵan ortany qorǵaý sharalaryna 9 mlrd teńgeden astam qarjy bóldi, bul 2016 jylǵydan 2 mlrd teńgege artyq. Esepti kezeńde lastaýshy zattardyń jıyntyq kólemi 2016 jylǵy kórsetkishpen salystyrǵanda 10 paıyzǵa azaıǵan. Qosymsha gaz tazalaýshy jabdyqtardyń ornatylýyn qamtıtyn birqatar tabıǵatty qorǵaý sharalaryn iske asyrýǵa baılanysty qaldyqtar kólemi qysqarǵan.

«Qazatomónerkásip» UAK» AQ Óndiristik qaýipsizdik departamentiniń dırektory Manas Ysqaqovtyń aıtýynsha bıznesti transformatsııalaý baǵdarlamasy aıasynda óndiristegi qaýipsizdiktiń barlyq mańyzdy taraptaryn qamtıtyn 14 korporatıvtik standart ázirlengen.

Keńes qorytyndysy boıynsha, ulttyq atom kompanııasynyń enshiles jáne táýeldi uıymdary arasynda ótkiziletin jyl saıynǵy konkýrstyń qorytyndysy jarııalanyp, óndiristik qaýipsizdikti qamtamasyz etýde úzdik kórsetkishterge ıe kásiporyndar anyqtalyp, jeńimpazdar marapattaldy.