«QazAtomÓnerkásip» álem naryǵynda baǵa qalyptastyrýshy kompanııaǵa aınalýy tıis - Ó. Shókeev

ASTANA. QazAqparat - Transformatsııa aıasynda «QazAtomÓnerkásip» ulttyq kompanııasy álem naryǵynda baǵa qalyptastyrýshy kompanııaǵa aınalýdy josparlaıdy. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Samuryq-Qazyna» Ulttyq ál-aýqat qory» AQ tóraǵasy Ómirzaq Shókeev osylaı málim etti.

Qor tóraǵasynyń aıtýyna qaraǵanda, búgingi tańda «Samuryq-Qazynaǵa» qarasty kompanııalardyń, sonyń ishinde uıymdyq qurylymdardyń barlyǵynda tereń, kúrdeli qaıta qurý jumystary atqarylýda. Atap aıtqanda, kompanııalar toby boıynsha bıznes úderisteri qaıta formattalǵan. «Jumysqa jaldaý, testileý, kadrlardy kótermeleý, qyzmetkerlerdi jumystan bosatýdyń barlyq úderis-erejelerin qaıta qarastyryp jatyrmyz. Munda másele ákimshilik-basqarý personaldary jaıynda bolyp otyr.

Basqarýshylyqtan bólek, óndiristik tehnologııalar da qaıta qarastyrylady. Sonymen qatar, búgingi kúni Qor aıasyndaǵy transformatsııa boıynsha jumystar «Samuryq-Qazynanyń» enshiles kompanııalarynda júrip jatyr», - dedi Ó. Shókeev.

Onyń sózine qaraǵanda, «QazMunaıGaz», «Qazposhta», «Qazaqstan temir joly», «QazAtomÓnerkásip», «Samuryq-Energo» sekildi kompanııalardyń menedjmenti belsendi jumysqa kirisken. Shamamen kompanııalardyń 750 qyzmetkeri modernızatsııalaý komandasyna shoǵyrlanǵan. Máselen, «Qazaqstan temir joly» jańa korporatıvtik mádenıetti engizý deńgeıinen ótýde. Al «Qazposhta» AQ óz qyzmetteriniń sapasyn arttyryp, básekege qabiletsizdik sebepterin aıqyndaýmen aınalysýda. «Transformatsııa aıasynda «QazAtomÓnerkásip» óziniń strategııalyq basymdyqtaryna jiti mán bere bastady. Bul kompanııanyń aldaǵy maqsaty álem naryǵynda baǵa qalyptastyrý qyzmetin tutynýshy emes, kerisinshe álemdik naryqtaǵy baǵany qalyptastyrýshy bolýy kerek. Buǵan «QazAtomÓnerkásip» kompanııasynyń múmkindikteri barshylyq», - dedi Ó. Shókeev. Tutastaı alǵanda, Qor basshysynyń aıtýy boıynsha, qazirgi tańda jeti iri kompanııada operatsııalyq transformatsııa jumystary júzege asýda. Barlyq kompanııalar boıynsha shamamen 40-qa jýyq bıznes úderis aıasynda muqııat taldaý jumystary jasalǵannan soń, jańa negizgi kórsetkishter aıqyndalady. «Transformatsııa tóńiregindegi reformanyń tıimdiligine kelsek, tek bir ǵana «Qazaqstan temir joly» kompanııasynyń ózi jyl saıynǵy 20 mıllıard teńgeniń tıimdiligin sezinetin bolady. Salystyrmaly túrde alsaq, «Qazaqstan temir jolynyń» byltyrǵy jylǵy taza tabysy 27,3 mıllıard teńgeni qurady. Al biz osy baǵdarlamanyń arqasynda ol kórsetkishti eki esege jýyq arttyramyz», - dedi Ó. Shókeev.