Qazanda teńgeniń nyǵaıýyna qandaı faktorlar áser etti

ASTANA. QazAqparat – Qazan aıynda teńge baǵamyna jáne valıýta naryǵyndaǵy jaǵdaıǵa qandaı faktorlar áser etti? Bul týraly Ulttyq bank tóraǵasynyń orynbasary Álııa Moldabekova málimdedi, dep habarlaıdy QazAqparat.

«Qazanda biz valıýta naryǵynda qalypty qubylmalylyqty baıqadyq. Bir aıdyń ishinde dınamıka ártúrli baǵytta órbidi. Qazannyń qorytyndysy boıynsha, teńge 1,7%-ǵa nyǵaıdy. Munaı baǵasynyń ósýi de teńgeniń nyǵaıýyna túrtki boldy. Bazalyq mólsherlemeni kóterý jáne kvazımemlekettik sektor sýbektileriniń satýy da teńgege qoldaý kórsetti.

Qazanda Ulttyq qordan valıýtany satý 362 mln AQSh dollary kóleminde boldy, bul rette bir saýda kúni ishinde satý kólemi 30 mln AQSh dollarynan asqan joq. Biz Ulttyq qordan valıýtany satý tek respýblıkalyq bıýdjetke transfertti qamtamasyz etý qajet bolǵan jaǵdaıda ǵana júzege asyrylatynyn birneshe ret atap óttik. Bizdiń tarapymyzdan osy operatsııalardyń valıýta naryǵyndaǵy aǵymdaǵy sentımentke áserin barynsha azaıtý úshin barlyq kúsh-jiger jumsalyp otyr. Valıýtany satý boıynsha mámilelerdi iske asyrý kezinde Ulttyq Bank price-taker retinde áreket etedi, ıaǵnı óz ótinimderin qoımaı, qolda bar ótinimder boıynsha «jumys júrgizedi». Naryqqa qatysýshylardyń baǵasymen kelise otyryp, biz operatsııalardyń naryqtyq baǵamǵa áserin joqqa shyǵaramyz.

Qazir valıýta naryǵy teńgerimdi. Valıýtalyq ınterventsııalar júrgizý qajet bolmady», - deıdi Álııa Moldabekova.