Qazan aıynda Qaraǵandy oblysynyń turǵyndary medıtsınalyq saqtandyrý qoryna 2,6 mlrd teńge aýdardy

QARAǴANDY. QazAqparat – Osy jyldyń qazan aıynda Qaraǵandy oblysynyń tóleýshileri medıtsınalyq saqtandyrý qoryna 2,6 mıllıard teńge aýdardy. Aımaq aýdarymdar boıynsha burynǵysynsha Almaty men Nur-Sultannan keıin kóshbasshylar úshtigin tuıyqtap tur. Degenmen oblysta 280 myńnan astam adam saqtandyrylmaǵan, dep habarlaıdy QazAqparat tilshisi.

2,6 mıllıard teńgeniń 1,2 mıllıardy qazan aıynda jaldamaly jumysshylar úshin aýdaryldy. Qalǵan 1,4 mıllıard teńgeni jeke kásipkerlerdiń, azamattyq-quqyqtyq sıpattaǵy sharttar boıynsha jumys isteıtin azamattardyń jáne derbes tóleýshilerdiń jarnalary qurady.

«Medıtsınalyq saqtandyrý júıesindegi jaldamaly jumyskerlerdiń mártebesi osy aýdarymdardyń júıeliligi men ýaqtylyǵyna baılanysty. Qazirgi ýaqytta oblysta ártúrli uıymdardyń 60 myńnan astam jaldamaly qyzmetkerleri saqtandyrylmaǵan kúıinde qalyp otyr. Jalpy alǵanda, medıtsınalyq saqtandyrý júıesinen tys 280 myńnan astam adam bar. Mártebeniń bolmaýynyń sebebi, ádette, sońǵy 12 aıda bereshektiń bolýymen baılanysty», – dep túsindirdi medıtsınalyq saqtandyrý qorynyń Qaraǵandy fılıalynyń dırektory Fazyl Kopobaev.

Eger oblys turǵyndarynda medıtsınalyq saqtandyrý aýdarymdary boıynsha bereshek paıda bolsa, olardy óteý qajet. Ol úshin, eń aldymen, qandaı aılar úshin qaryz bar ekenin, qandaı sebeppen ekenin anyqtaý kerek. Eger jumys berýshi ýaqytynda jarna jasamasa, jumys ornyndaǵy býhgalterııaǵa júginý qajet. Eger táýelsiz tóleýshi bolsa, onda qaryzdy tóleý kerek. Óz mártebeńizdi jáne qaryz jaıly Telegram-da SaqtandyryBot arqyly jáne fms.kz saıty, qoldau-24/7 mobıldi qosymshasy arqyly teksere alasyz.