Qazan aıynda 3 myńnan astam altyn quıma satylǵan

ASTANA. QazAqparat – Qazan aıynda ekinshi deńgeıli bankter men banktik emes jekelegen aıyrbastaý pýnkterinde jalpy salmaǵy 125,66 keli 3 130 altyn quıma satyldy. Bul týraly QazAqparat Ulttyq banktiń resmı saıtyna silteme jasap habarlaıdy.

Quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi – 25% nemese 27 596 dana. Odan keıin 5 gramdyq altyn quıma – 23 362 dana (22%) jáne 20 gramdyq quıma – 22 555 dana (21%), 100 gramdyq quıma – 22 075 dana (20%), al 50 gramdyq quımadan – 12 487 dana (12%) satylǵan. Altyn quımalar Almaty, Astana, Atyraý jáne Qaraǵandy qalalarynda kóp satylady.

Aıta ketsek, azamattarǵa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3,67 tonnaǵa jýyq 108 075 altyn quıma satyldy. Sondaı-aq, ekinshi deńgeıli bankter men banktik emes jekelegen aıyrbastaý pýnkteri jalpy salmaǵy 437 keli 17 434 altyn quımany keri satyp aldy, bul – jalpy satylǵan altyn quımalardyń 16,1%-y. Olar keri satyp alǵan altyn quımalardyń barlyǵy derlik Ulttyq Banktiń fılıaldary arqyly satylady.

Ashyq kózderden alynǵan foto