Qazan aıynan beri 1 mıllıonnan astam qazaqstandyq JRVI juqtyrǵan
«Jyl saıyn qazan men sáýir aralyǵy - jiti respıratorlyq vırýstyq ınfektsııa jáne tumaý órshıtin maýsym. Dúnıejúzilik densaýlyq saqtaý uıymynyń derekteri boıynsha bıyl epıdemııalyq maýsymda vırýstyń úsh shtamy ózekti. Ol A (H1N1), A (H3N2) jáne B shtamy. Sondyqtan bıylǵy vaktsına quramyna bul shtamdar engizilgen. Elimizde JRVI jáne tumaýdyń taralý jaǵdaıyn monıtorıngileý jyl saıyn 1 qazan men 30 sáýir aralyǵynda júrgiziledi. Bıyl epıdemııalyq maýsym bastalǵaly (2022 jylǵy 1 qazannan bastap) 1 mln 27 myń JRVI jaǵdaıy tirkeldi», - dedi QR DSM sanıtarııalyq-epıdemıologııalyq baqylaý komıteti tóraǵasynyń orynbasary Maral Raqymjanova ortalyq kommýnıkatsııalar qyzmetinde ótken baspasóz máslıhatynda.
Sondaı-aq maýsym bastalǵaly 865 adam tumaýǵa shaldyqqan. Onyń ishinde 14 jasqa deıingi 341 bala bar.
«Jyl saıyn tumaý jáne JRVI boıynsha sanıtarııalyq-profılaktıkalyq is-sharalar turaqty ótip turady. Bıyl 19 qyrkúıekte Qazaqstan Respýblıkasynyń Bas memlekettik sanıtarııalyq dárigeriniń bıylǵy epıdemııalyq maýsymǵa tumaý jáne JRVI boıynsha sanıtarııalyq-profılaktıkalyq, sanıtarııalyq-epıdemııaǵa qarsy is-sharalardy júrgizý týraly qaýlysy shyqty. Oǵan sáıkes medıtsınalyq uıymdardyń tumaýǵa qarsy ımmýndaý naýqanyn ótkizýge, tumaýmen jáne JRVI-men aýyratyn naýqastardy qabyldaýǵa daıyndyǵy pysyqtaldy. Sonymen qatar zerthanalardyń tumaý, JRVI jáne basqa vırýstar boıynsha zertteýler júrgizýge daıyndyǵy qamtamasyz etildi», - deıdi ol.