Qazalyda túlekter týǵan aýylyna balalar alańyn salyp berdi

QAZALY. QazAqparat - Qazaly aýdanyna qarasty Bozkól aýylyndaǵy №96 mektepti 10 jyl buryn bitirgen túlekter týǵan aýlyna balalar oıyn alańyn salyp berdi, dep habarlaıdy QazAqparat tilshisi. 

Týǵan jerinde bas qosqan túlekter aýyldaǵy "Bolat Ábilov" atyndaǵy ortalyq saıabaqty kórkeıtip, balalar oıyn alańyn saldy.

«Biz bul sharýany maqtaý estý úshin jasap jatqan joqpyz. Bar maqsatymyz - týǵan elimizge az da bolsa óz paıdamyzdy tıgizý. On bir jyldyqty birge bitirgen 11 bala uıymdasyp, ortalyq saıabaq ishinen syrǵanaq, átkenshek sekildi dúnıeler bar balalar oıyn alańyn jabdyqtap jatyrmyz. Aýyl baldyrǵandary bos ýaqytyn osyndaǵy oıyn alańynda ótkizse bir ǵanıbet emes pe?! Bul bizdiń týǵan elimizdiń damýyna qosqan tamshydaı bolsa da úlesimiz. Eń bastysy - týǵan aýylymnyń irgesi sógilmeı, berekesi arta berse bolǵany», - deıdi Muhıt Inııatov.

Týǵan jerge degen qoldaý munymen shektelgen joq. Olar voleıbol alańy men jastar jattyǵatyn týrnık, qossyryq sııaqty sporttyq qondyrǵylar da salyp berýde. Bozkóldik jastar sport alańyn mektepte on bir jyl birge oqyp, marqum bolyp ketken Nurǵısa Saparovtyń qurmetine oraı ashyp otyr eken. Synyptastar jastaıynan sportqa jany qumar dostaryn eske alý maqsatynda fýtboldan týrnır ótkizýdi de josparlap otyr.

"Ómirge qushtar Nurǵısa bizdiń jadymyzda máńgilikke saqtalady. Eshkimge jamandyq oılamaıtyn baýyrymyzdyń atyndaǵy aıaqdop básekesin onyń týǵan kúni - 23 shildege belgilep otyrmyz", - degen josparymen bólisti ıgilikti istiń basy-qasynda júrgen Dinmuhammed Ábilov.

Aýyl turǵyndary da jastardyń oń bastamasyna dán rıza. Bul týraly bizben áńgime barysynda Bozkól aýyldyq okrýginiń ákimi Marhabat Qanıev aıtyp berdi.

«Jaqynda Bozkól aýylynda turatyn balalar úshin úlken mereke bolǵaly tur. Olaı deıtin sebebimiz, Qarasaqal Erimbet atyndaǵy №96 mektepti osydan on jyl buryn bitirgen shákirtterimiz aýyldan balalardyń oıyn alańyn jabdyqtaýda. Mundaı syılyqqa aýyl halqynyń alǵysy sheksiz. Ásirese, bala kútimimen aınalysatyn ájeler jaz aılarynda oıyn alańy balalardyń basyn qosatyn jaqsy oryn bolady dep qýanyp júr. Amandyq bolsa, balalar oıyn alańy 1 maýsym - Halyqaralyq balalardy qorǵaý kúninde paıdalanýǵa beriledi», - deıdi aýyl basshysy.