Qazalyda mektep muǵalimi balalarǵa aǵylshyn tilin tegin úıretetin kýrs ashty
Aıta ketý kerek, «Nur Otan» partııasy Qazaqstan boıynsha English for Jastar jobasyn iske qosty. Qyrkúıek pen qarasha aıynynyń aralyǵynda ótkiziletin pılottyq jobaǵa Qyzylorda oblysy boıynsha 11 oqytýshy-erikti iriktelip alyndy. Solardyń biri - Áıgerim Amantaeva Qazaly aýdanynda oqytý kýrstaryn júrgizýde.
Q.Jubanov atyndaǵy Aqtóbe óńirlik memlekettik ýnıversıtetin úzdik bitirgen ol qazirgi tańda aýdandaǵy №266 mektep-lıtseıde aǵylshyn páninen sabaq beredi. Áleýmettik jelide qysqa vıdeosabaqtar túsirip, óz aýdıtorııasyn jınap úlgergen Áıgerimniń bala oqytýǵa degen yqylasy erekshe. Sony baıqaǵan joba úılestirýshileri muǵalimdi birge jumys jasaýǵa shaqyrǵan.
Jastar jobasy oblys boıynsha 350 oqýshynyń aǵylshynsha bilimin jetildirý josparlanǵan. Atalǵan kýrsqa Qazaly aýdanynan 30 óren qatysýda. Aýdanǵa bekilgen meje de osy. Ártúrli qyzyqty taqyrypta ótkiziletin kýrs aptasyna úsh ret ótedi. Eki saǵatqa sozylatyn sabaqqa 7-11 synyp oqýshylary qalmaı keledi.
Solardyń arasynan mektep-lıtseıdiń belsendiligimen kózge túsip júrgen 10 synyp oqýshysy Aıdana Aıdarbaı: «Búgin aǵylshyn tiliniń ıdeomasy men frazalyq etistikterdi meńgerdik. Apaıdyń taqyryptyq mysaldary men oqytý ádisi bizge erekshe unaıdy. Birinshi sabaqta oqýshylar az boldy. Túrli qyzyqty oıyndar oınap, ómirge qajetti sózderdi úırenip alǵasyn basqa dostarymyzǵa da aıttyq. Qazir aýdıtorııa tolyp otyramyz. Basqa pánderden tapsyrmalarymyz kóp bolsa da kýrsty jiberip almaýǵa tyrysamyz. Qazirdiń ózinde shet tili gramatıkasyn meńgerip, júzden asa sóz jatap aldym», - dedi.
Fakýltatıvterde oqýshylar mektepke qaraǵanda anaǵurlym tereń bilim alýda. Ol úshin jobany iske asyrýshylar 172 Elementary men Pre-Intermediate oksfordtyq qural jıyntyqtaryn jetkizip bergen. Ár jıyntyqta oqýshylarǵa arnalǵan Student's Book, tapsyrmany jasaýǵa arnalǵan Workbook, sonymen birge aǵylshyn tilindegi fılmderdiń DVD-dıskisi bar. Al kýrs ótkizý barysynda qajetti keńse qural-jabdyqtarmen «Nur Otan» partııasynyń Qazaly aýdandyq fılıaly qamtamasyz etip otyr.
Ózine bekitilgen sabaqtardan bólek fakýltatıvtik kýrsqa da asqan daıyndyqpen keletin Á.Dýlatqyzy sabaqty ótkizý úshin qolaıly jaǵdaı jasap otyrǵan mektep basshylyǵyna dán rıza. Tájirıbe almasý úshin basqa muǵalimder de sabaqqa qatysatyn kórinedi. Jas mamannan eriktiler qataryna ne sebepti qosylǵandyǵy jaıynda suraǵanymyzda:
«Joba maqsatynyń bir baǵyty - aqyly qosymsha sabaqqa qatysýǵa múmkindigi tómen balalardyń shet tilin meńgerýine jaǵdaı jasaý. Osyndaı fakýltatıvti-qosymsha sabaqtarsyz aǵylshyn tilin meńgerý óte qıyn. Sol sebepti «English for Jastar» jobasyna qatysamyn dep sheshtim», - dedi Áıgerim.