Qazalyda Abaı shyǵarmalaryn túgeldeı jatqa biletin oqýshy turady
Búginde Aıaýlym Ázen toǵyzynshy synypta oqıdy. Bala kezinen ol Abaı óleńderin jattaýǵa qumartqan. Oǵan ákesi Jeńisbek Aralbaev áser etken. Sodan beri Aıaýlym qazaqtyń uly aqynynyń shyǵarmalaryna qyzyǵýshylyǵy artyp, onyń búkil shyǵarmashylyǵyn jattap alýǵa kóńil bólgen. Sondaı-aq, Aıaýlymnyń esepke de júırkitigi baıqalady. Onyń ustazy Maıra Omarova shákirtiniń óte uqypty ekenin jetkizdi. Abaı shyǵarmalaryn bastan-aıaq jattap alý - eki adamnyń biriniń qolynan kele bermeıtin qasıet.
Onyń aıtýynsha, Abaıdyń óleńderin jattaýda men óz ádisine súıenedi. Eń basty nazarda ustanatyny - árbir óleńniń, árbir shyǵarmanyń mazmunyna tereń úńilip, ony zerdeme toqý.
«Ǵulamanyń shyǵarmalaryn oqyǵan saıyn meniń jan-dúnıem baıyp, rýhanı mol qazynaǵa ıe bolamyn. Men bala kezimnen oqýǵa kóńil bólip, bilim alýǵa áýes boldym. Osy arqyly men bilikti maman atanyp, elge qyzmet etkim keledi», - dedi Aıaýlym..
Aıaýlym Abaıdyń qara sózderin jatqa aıtýshylar arasyndaǵy respýblıkalyq baıqqaýda úshinshi oryn alǵan. Byltyr «Qazaq Epos» respýblıkalyq aǵartý jobasy «Tulpar minip, tý alǵan!» baıqaýynda da Qobylandy batyr jyryn jattaýshylar órender arasynda jeńimpazdar qatarynan kórindi.
Ákesi Jeńisbek Aralbaevtyń aıtýynsha, mektep tabaldyryǵyn attaǵannan keıin barlyq sabaqqa jaqsy qabiletin kórsetip, ozat oqýshy atanyp úlgergen. Zerek qyz Abaıdyń óleńderin alǵashqyda bir-eki shýmaqtan zerdesine toqysa, odan keıin óleńdi tolyǵymen jattaıtyn jaǵdaıǵa jetti.
«Aıaýlym - qyzdarymnyń tuńǵyshy. Ár ata-ana balasynyń jetistikke jetkenin, bıikterden kóringenin qalaıdy. Men de qyzymnyń sabaqqa degen yntasyn arttyrý maqsatynda kóp qadaǵaladym. Ádepkide matematıkaǵa degen qushtarlyǵyn eskerip, osy baǵyttarda jumys jasadyq. Odan keıin, Abaı atamyzdyń óleńderine den qoıǵyzdym. Óleń-jyr kez kelgen janǵa jiger men shabyt syılaıdy. Este saqtaý qabiletin de arttyratyny taǵy bar», - dedi ákesi Jeńisbek Aralbaev.