Qazaqy ıt tuqymdaryn halyqaralyq deńgeıde tanýǵa ótinim berildi

ASTANA. QazAqparat - Halyqaralyq kınologııa federatsııasyna qazaqy ıt tuqymdaryn álemdik deńgeıde taný týraly ótinim berildi. Bul jaıynda «Qazaqstan kınologtar odaǵy» RQB prezıdenti Baýyrjan Serikqalı málim etti, dep habarlaıdy QazAqparat tilshisi.

«Qazaqy ıt tuqymdaryn álemdik deńgeıde taný úshin halyqaralyq kınologııalyq federatsııaǵa ótinim berý qajet. Bul jerde basty talap – elimizdiń kınologııalyq qoǵamdyq uıymynyń halyqaralyq kınologııa federatsııasyna tolyq quqyly músheligi», - dedi Baýyrjan Serikqalı ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, bıyl mamyr aıynda Belgııanyń Tıýen qalasynda halyqaralyq kınologııalyq federatsııa basshylyǵymen kelissóz júrgizildi.

Kezdesý aıasynda Qazaqstan kınologtar odaǵynyń halyqaralyq kınologııalyq federatsııaǵa tolyq quqyly músheligine resmı ótinim berildi. Atalǵan másele 21-22 tamyzda Jenevada (Shveıtsarııa) halyqaralyq kınologııalyq federatsııanyń bas assambleıasynda qaralady.