Qazaqtyń jeri jumaq qoı - Nursultan Nazarbaev
«Iá, terrıtorııamyz keń, sýdyń tapshylyǵy bar. Degenmen, Qazaqstanda jerasty sýdyń qory jetkilikti. Máselen, buryn bizde 1500 qudyq boldy. Sonda árbir qudyqtyń janynda 10 myń bas maldy ósirýge bolady. Anaý Izraıldi qarańyzshy, osy eldiń burynǵy prezıdenti, marqum Shımon Peres aıtyp otyratyn, 500 myń evreıdi jınap alyp, qumdy ári tastaq jerge jiberdik dep. Qazir Izraıl bizge jyl on eki aı qulpynaıdy jetkizip otyrady. Sonyń bárin olar qumdy jerde ósirdi. Sýlary joq bolsa da, Jerorta teńiziniń sýyn aýyz sýǵa aınaldyrýdy úırendi. Sóıtip, óndiristerin kóterip aldy. Oǵan qaraǵanda, bizdiń dalamyz jumaq qoı», - dedi N.Nazarbaev Jastar jylynyń saltanatty ashylý rásiminde.
Prezıdenttiń aıtýynsha, elimizde egindik jáne jaıylym jerleri jeterlik. Sonyń barlyǵyn tıimdi paıdalanyp, ǵylymı tehnologııalardy engizetin bolsaq, álem halyqtaryn asyraı alamyz. Sodan mol tabys tabýǵa múmkindik bar.
«Sol sebepti agrarlyq keshen biz úshin mańyzdy máselelerdiń biri ári biregeıi bolyp sanalady. Biz osy salada óz brendterimizdi jasaı alamyz. Ashyq aıtaıyn, qazir bir ınvestorlar jer surap otyr. Soǵan Amerıkanyń tehnologııalaryn engizýge ázir. Máselen, AQSh-tyń Dakota shtatynda bizden jeti ese artyq ónim alyp otyr. Ondaı tehnologııalardy óz jerimizde de engize alamyz ǵoı. Qazaqstanda agrarlyq keshen strategııalyq sala bolyp sanalady. Bolashaqta atalǵan sala otandyq ekonomıkanyń basty draıverine aınalýy ábden múmkin», - dep atap kórsetti N.Nazarbaev.
Aıta keteıik, búgingi shara barysynda Prezıdent aýylǵa barǵan jastardyń járdemaqysyn kóbeıtýdi tapsyrdy.