Qazaqtyń tuńǵysh Olımpıada chempıony Astanaǵa keledi

ASTANA. QazAqparat - 1972 jylǵy Olımpıada chempıony, basketbolshy Áljan Jarmuhamedov «Astana» akademııasynyń shákirtterine arnap master-klass ótkizedi. Chempıondy «Astana» basketbol klýby shaqyryp otyr, dep habarlaıdy QazAqparat tilshisi Elorda-Aqparatqa silteme jasap.

Jospar boıynsha Á.Jarmuhamedov balalarǵa basketboldyń qyr-syryn úıretedi. Odan keıin Olımpıada chempıony balalarmen birge «Dvıjenıe vverh» atty fılmniń jabyq kórsetilimine qatysady. Atalǵan kartınada 1972 jylǵy Olımpıada kezinde KSRO basketbolshylarynyń jeńisi jaıynda baıandalady.


Aıta ketken jón, 1972 jyly Mıýnhende KSRO men AQSh-tyń arasynda tarıhı fınaldyq match ótken bolatyn. Sol oıynda Keńester Odaǵynyń basketbolshylary sońǵy úsh sekýndtyń ishinde Amerıka quramasyn jeńgen edi. KSRO-nyń quramynda Áljan Jarmuhamedov ta boldy. Qazirgi kezde qazaq chempıony Máskeýde turady.