Qazaqtyń tuńǵysh generaly Jansen Kereevtiń týǵan jerinde eskertkish músini ornatyldy
Jansen Kereev Temir aýdany, Qaıyńdy aýyly, Babataıda dúnıege kelgen. Mektep bitirgen soń áskerı ýchılışeni, keıin Frýnze atyndaǵy áskerı akademııany altyn medalmen támamdady. Jerlesteri qazaqtyń tuńǵysh general-leıtenanty Jansen Kereevtiń 90 jyldyǵyna oraı jastarǵa ıdeologııalyq-patrıottyq tárbıe berý maqsatynda eskertkish ornatý jumystaryn qolǵa alyp, jobany tolyq iske asyrdy.
«Áskerge shaqyrylyp, Otan aldyndaǵy boryshyn adal atqardy. Bilim alǵan soń Chıta qalasynyń irgesindegi Peschanka eldi mekenindegi polkte vzvod komandıri bolyp qyzmet atqardy. 1956 jyly Jansen Kereev Germanııadaǵy keńes áskerleriniń tobyna tank bóliminiń motoatqyshtar rotasyna vzvod komandıri boldy. Leıtenant sheninen generalǵa deıin kóterildi. Onyń eńbek joly men qaısarlyǵy, bilimi men biliktiligi óskeleń urpaqqa úlgi. Týǵan jerindegi mýzeıde onyń jeke zattary qoıylǵan. Al eskertkish Jansen Kereev atyndaǵy kóshege ádeıi qoıyldy», - dedi aýdandyq ardagerler keńesiniń tóraǵasy Nurmuhan Ótepov.
Eskertkishtiń ashylýyna aýdan ákimi bastaǵan bólim, mekeme basshylary qatysyp, gúl qoıdy. Tótenshe jaǵdaı kezinde qaýipsizdik erejesi, araqashyqtyq saqtaldy.
Aıta keteıik, Temir aýdanynyń ortalyǵy Shubarqudyq kentinde Jansen Kereev atynda orta mektep pen kóshe bar.