Qazaqtyń Qurmanǵazy atyndaǵy akademııalyq ult aspaptar orkestrine 75 jyl toldy
Qazaqstannyń eńbek sińirgen qaıratkeri Erkebulan Músireppen sáti túsken suhbatty nazarǵa tartamyz.
- Orkestrdiń mereıtoıy qutty bolsyn! Keshe Astanada ótken kontsertte Mádenıet jáne aqparat mınıstri qatysyp, quttyqtaýyn jetkizdi. Sonymen birge zalda jıylǵan elorda turǵyndary da erekshe qoshemetin kórsetti.
- Rahmet! Keshe, ózderińiz de kýá boldyńyzdar Astananyń tórinde mereıtolyq kontsert ótkizdik. Kongress-Holl zaly halyqqa lyq toly boldy. Osy ónerimizdi halqymyz ańsap qalǵan eken. Sondyqtan shashý retinde Astanaǵa ańsatyp keldik.
- Mádenıet jáne aqparat mınıstri aldaǵy jyly orkestrdiń saltanatty sherýi Eýropa elderine jalǵasatynyn aıtty. Al bıylǵy jyly qazaq ónerin dáripteýdegi saparlaryńyz qalaı ótti?
- Atap aıtsaq, bıylǵy jyl biz úshin qýanyshty jyl boldy dep aıtsam qatelespeımin. Eki ret gastroldik saparmen Germanııaǵa bardyq. Onyń birinshisinde Qazaqstan jylynyń osy elde resmı ashylýyna barsaq, ekinshi ret sáýirde jeke saparmen boldyq. Sonymen qatar taıaý kúnderi Túrkııanyń Ystambul qalasynda ónerimizdi jurshylyqtyń nazaryna tarttyq. Al keshe elordamyzda Qurmanǵazy orkestriniń 75 jyldyǵyna arnalǵan kontserttiń shymyldyǵyn ashtyq. Endi Almatydaǵy Abaı atyndaǵy opera jáne balet teatrynda jeltoqsannyń 21-inde mereıtoılyq kontsert ótkizbekpiz.
- Búginde elimizdiń Ata orkestri sanalyp júrgen ujymda qansha ónerpaz qyzmet etip júr?
- Bul Ahmet Jubanov atamyzdyń bastamasymen qurylǵan orkestr ǵoı. Alǵashynda bul orkestr 11 adamnan qurylǵan bolatyn. Sodan keıin orkestr quramy 50 adamnan, keıinnen 70-ke jetkizildi. Qazir endi 80 adam óner kórsetip júr. Qazirgi kezde orkestr quramynda úsh dırıjer bar. Daǵdarysqa qaramastan, memleket tarapynan, mınıstrlik tarapynan udaıy qoldaýǵa ıe bolyp otyrmyz. Atap aıtqanda, ujymda Qazaqstannyń eńbek sińirgen qaıratkerleri, Qazaqstannyń halyq ártisteri, mádenıet qaıratkerleri bar. Munymen qosa, kontsert barysynda keshe mınıstr Muhtar Qul-Muhammed ujymdaǵy jeti adamdy «Mádnıet qaıratkeri» belgisimen marapattady. Osy oraıda ónerimizdi baǵalap, bizge degen qoshemetke ózimiz bir serpilip, kóterilip qaldyq.
- Orkestr quramy jabdyqtarmen, aspaptarmen jáne basqa da qajettiliktermen qalaı qamtamasyz etilýde?
-Bul jaǵyn Mádenıet jáne aqparat mınıstrligi udaıy nazarynda ustap keledi. Qarjylandyrý, qamtamasyz etýde vedomstvo jaǵynan keńqoldylyq baıqalyp otyr. Muhtar Abraruly orkestrdiń repertýaryna qatysty da bizben árqashan aqyldasyp otyrady.
- Óner jolyndaǵy eń úlken ujym retinde elimizdiń basqa da aımaqtaryndaǵy orkestrlermen tájirıbe almasý jumystaryn júrgizesizder me?
- Qurmanǵazy orkestri búginde ortalyq laboratorııaǵa aınaldy. Dırıjerler, dombyrashylar, qobyzshylar bizden tájirıbeden ótedi. Oblystyq orkestrlerge tájirıbe jaǵynan, repertýar jaǵynan da óz kómegimizdi kórsetemiz. Sonymen qatar, Sankt-Peterbordaǵy ımperatorlyq orkestrmen ózara baılanysta bolyp turamyz. Tájirıbe almasý maqsatynda dırıjerler men mýzykanttar aralasyp turady. Táttimbet atyndaǵy qazaq halyq aspaptar orkestri óziniń janry, jolymen, repertýarymen erekshelenetin ujym. Osy oraıda biz ózimizdiń repertýarymyzben bólisip, kómektesemiz. Búginde bizdegi repertýar 4 myńnan astam. Onda jańa ánder, kúıler, shyǵarmalar jınaqtalǵan.
QazAqparat anyqtamasy: Qurmanǵazy atyndaǵy akademııalyq qazaq ult aspaptar orkestrin alǵashynda Almatyda mýzykalyq drama tehnıkýmynyń janynan dombyra ansabli retinde Ahmet Jubanov uıymdastyrdy. Orkestr ár jyldarda jas maman kadrlarmen tolyqtyrylyp otyrdy. Kezinde orkestrge M. Tólebaev, N. Tilendıev, A. Myrzabekov, L. Hamıdı, Q. Mýsın, L.M. Shargorodskıı dırıjer boldy. Atalǵan óner ujymy 1953 jyly Býharest qalasynda ótken jastar men stýdentterdiń Búkil dúnıejizilik festıvaliniń altyn medaline ıe boldy. «Halyqtar dostyǵy» ordenimen, Qazaqstan Joǵarǵy Keńesiniń Qurmet gramotasymen marapattalǵan.