Qazaqtyń qos tazysy Shveıtsarııadaǵy Álem chempıonatynda tıtýldarǵa ıe boldy

JENEVA. QazAqparat – Jeneva qalasynda ótken Álem chempıonatynda moıyndalmaǵan tuqymdar tobynda (FCI Halyqaralyq kınologııalyq federatsııanyń 11-toby) qazaqtyń eki tazysyna eń joǵarǵy tıtýldar berildi, dep habarlaıdy «QazAqparat» menshikti tilshisi.

«Strana Belovodıa» (ShQO) tálimbaǵynan shyqqan «Tumar» esimdi tazy «Tuqymnyń úzdik ókili» jáne «Jenevadaǵy Álem kýbogynyń jeńimpazy» ataqtaryna laıyq tanyldy. Osy tálimbaqtan shyqqan ekinshi ıt «Vangelııa» da birneshe tıtýlǵa ıe boldy, atap aıtqanda «Qarsy jynystyń úzdik ókili» jáne «Jenevadaǵy Álem kýbogynyń úzdik ardageri» atandy.

Qazaqstan kınologteri odaǵyndaǵy ulttyq tazy klýbynyń basshysy Elena Hardına bul jeńiske 2006 jyldan beri talpynyp kele jatqandaryn aıtady.

«Meniń mindetim myqty jáne saý tazylardy shyǵarý, olarmen barlyq halyqaralyq kórmelerge qatysý boldy, ondaǵy maqsat – bizdiń tuqymdy álemniń ár jerinde kórsetý», - deıdi ol.

Aıtýynsha, bizdiń ıtterge Reseıden shyǵyp, Italııada turyp jatqan tazylar básekeles bolǵan.

«Osy Jenevadaǵy básekelesterimiz osal bolmady, tolqydyq. Biraq, biz jeńdik! Óte qýanyshtymyz, sebebi tazynyń otany – Qazaqstannan shyqqan ıtter jeńilýi múmkin emes. Biz aldaǵy ýaqytta da jeńis tuǵyrynda bolýymyz kerek. 2016 jylǵy Álem chempıonatynda jeńgenbiz, ol kezde belarýstik tazylarmen básekelestik», - deıdi E. Hardına.

Kınolog Jenevada tazylarǵa degen qyzyǵýshylyq joǵary bolǵanyn aıtady.

«Kórmeni tamashalaýǵa kelgenderdiń kóbi janymyzǵa kelip, ıtterimiz týraly surap, fotoǵa túsip jatty. Qyzyǵýshylyq joǵary boldy», - dep atap ótti ol.

Aıta ketsek, Shveıtsarııada turatyn qazaqstandyq qaýymdastyq ókilderi delegatsııaǵa qoldaý bildirý úshin keldi.

Buǵan deıin habarlaǵanymyzdaı, mıkroavtobýspen 12 eldiń shekarasynan ótip, 8 myń shaqyrymǵa jýyq jer júrgen qazaqstandyq kınologter komandasy Jenevaǵa jetti.