Qazaqtyń kórisý dástúri bizge de jat emes –Atyraýdaǵy ózge etnos ókilderi
Atyraý oblysynda 19 etnomádenı birlestik jumys isteıdi. Sonyń biri –«Tatýlyk» tatar-bashqurt etnomádenı birlestigi. Oǵan kóp jyldan beri jetekshilik etetin Gúlsına Baıkenova birlestik janyndaǵy bı úıirmesine tek tatar-bashqurt etnosynyń ǵana emes, Atyraýda turatyn barlyq ulttyń balalaryn qabyldaǵan.
«Qazaq halqynyń tatýlyq pen baýyrmaldyqqa úndeıtin Kórisý dástúri bizge de jat emes. Óıtkeni, bul bir kúnmen ǵana shekteletin shara emes. Kópshilik osy kúngi shat-shadyman kóńilmen Naýryz merekesin de qarsy alady. Kórisý –tamyry tereńge jaıylǵan qazaq halqynyń ulttyq rýhynyń bıiktigin, sat-dástúri men mádenıetiniń beriktigin urpaqtan-urpaqqa jetkizetin taǵylymdy shara. Sol sebepten, biz de Kórisýdi tatýlyq pen birliktiń, izettilik pen meıirimdiliktiń, kishipeıildiktiń merekesi retinde asyǵa kútemiz. Ásirese, jastardyń úlkenge qurmet kórsetetin izettiligi barshamyz úshin ónege bolary daýsyz.
Bul kúni bizdiń otbasymyzda da mereke bastaý alady. Merekelik kóńil-kúı bar adamǵa erekshe áser etedi ǵoı. Tabıǵattyń jańaryp, jazıraly keń dalanyń býsanyp jatatynyndaı, Kórisýden bastaý alǵan jańarý belsendi eńbek etýge, jańa ıdeıalardy iske asyrýǵa degen qulshynysty arttyra túsedi. Ásirese, shyǵarmashylyq salasynyń ókilderine keremet shabyt syılaıdy» -dedi «Tatýlyk» tatar-bashqurt etnomádenı birlestiginiń jetekshisi Gúlsına Baıkenova.
Al, Mahambet aýdanynda turatyn Lıdııa Chýgýnova da Kórisýdiń ultaralyq dostyqty nyǵaıtýǵa oń yqpaly baryna toqtaldy.
«Bizdiń aýdanda qazaqtyń syrlas dosyna, myń jyldyq qudasyna aınalǵan ózge ulttyń ókilderi kóp. Biz bir-birimizdi eshqashan jatsynǵan emespiz. Al, qazaq halqy qaı kezde de ózge etnosty darhan kóńilimen, qonaqjaılyǵymen baýyryna tartyp keledi. Ásirese, Kórisý kúniniń biz úshin mańyzy zor. Óıtkeni, bul kúni jastar úlkenge qos qolyn usyna kórisip, úlkender ózine kishilerge «Jasyń qutty, ǵumyryń uzaq bolsyn!» dep batasyn beredi. Elge jaqsylyq tilep jatady. Bir-birimen tós túıistire kórisken barshanyń tileýi de bir. Bul –el birliginiń nyǵaıýy, turmystyń jaqsarýy.
Mine, bir-birine aqjarma tilek aıtylatyn Kórisýdiń osyndaı taǵylymdyq máni bar. Eń bastysy, bul kúni pende bolǵan soń, ara-tura kezdesetin ókpe-renishtiń bári umytylady. Osy kúnnen bastap kórshi-qolańmen aralas-quralastyq burynǵydan da bekı túsedi. Osynyń bári jas býynǵa úlken úlgi-ónege emes pe», -deıdi Lıdııa Chýgýnova.