Qazaqtyń kıiz úıi Tel-Avıvte ótken tanymal halyqaralyq týrıstik kórmege qoıyldy
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, koronavırýs pandemııasy bastalǵannan beri alǵash ret offlaın formatta ótken kórmege birneshe myń qonaq, sondaı-aq álemniń 50-den astam eliniń týrıstik ókilderi jınaldy.
Týrıstik jármeńkeni Izraıl Prezıdenti Itshak Gertsog ashty.
Qazaq kıiz úıi is-shara qonaqtarynyń erekshe iltıpatyna bólendi, al Izraıldiń Týrızm mınıstri Ioel Razvozov ekspozıtsııany alǵashqylardyń biri bolyp tamashalady.
Kórmege kelýshiler qazaq halqynyń salt-dástúrlerimen tanysyp, kıiz úı elementteriniń qasıetti maǵynasy týraly bilip, qazaq taǵamdarynyń dámin tatyp, ulttyq kıimderdi kıip kórip, qazirgi Qazaqstannyń tabıǵaty, sáýleti men turǵyndary beınelengen fotosýretterdi tamashalap, dombyranyń áýenine qulaq túrdi.
IMTM Shyǵys Jerorta teńizi aımaǵyndaǵy týrızm salasyndaǵy eń iri kórme bolyp tabylady jáne Izraıldiń týrızm mınıstrligi, Qonaq úıler qaýymdastyǵy, Týrıstik agenttikter qaýymdastyǵy jáne Izraıl týroperatorlar qaýymdastyǵynyń keń qoldaýymen ótedi.