Qazaqtyń epostyq jyrlary komıks tilinde sóıledi
«Eńlik-Kebek», «Estaı-Qorlan», «Qozy Kórpesh–Baıan sulý», «Jumbaqtas», «Aısha bıbi», «Shaıtankól», «Balqash».
«Uly dalanyń ańyzdary» degen atpen shyǵarylǵan qazaq komıksteriniń jańa toptamasyna qazaq aýyz ádebıetiniń osyndaı týyndylary enipti.
Uıymdastyrýshylar komıkster jelisimen túsirilgen kórkem fotosýretter kórmesin de usyndy.
«Joba Elbasynyń «Uly dalanyń jeti qyry» atty baǵdarlamalyq maqalasyn iske asyrý aıasynda qolǵa alynǵan. Bul jolǵy toptamaǵa qazaq dalasyndaǵy jeti lıro-epostyq jyr men batyrlar týraly ańyzdardy ózek etip aldyq. Ondaǵy maqsatymyz –qazaqtyń tól folkloryn jas býynǵa zamanaýı tásildermen meńgertý. Mysaly, «Qozy Kórpesh – Baıan sulý» eposynyń 89 betke sozylatyn nusqasy bar. Ony qazirgi blalar oqyp otyrmaıtyny túsinikti. Sony bizdiń jas aqyn-jazýshylar qysqasha mazmunap, eń negizi tustarynan dıalogtar qurap, komıkske ıkemdep jazyp shyǵady. Sýretshiler sonyń jelisimen komıks salady. Ázirge komıks stsenarıin Dosqan Jylqybaev degen jigit jazyp júr. Al sýretterin áýeldi Murat Dilmanov salyp bastaǵan. Qazir oǵan eki jas sýretshi qosyldy», - deıdi Nursultan Nazarbaev qory janyndaǵy Memlekettik tildi damytý qorynyń dırektory Azat Sháýeev.
Sondaı-aq, ol bir erteginiń komıksi birden úsh tilde berilgenin aıtty.
«Uly dalany uly mahabbaty» degen toptamamen qazaq folklorynda keń taraǵan jeti ǵashyqtyń jyryn, «Uly dalanyń batyrlary» degen toptamamen Er Tóstik pen Alpamystan bastap, Kenesarymen túıindeletin 7 batyrdy berdik. Batyrlar toptamasyn bertingi batyrlarǵa deıin túgel qamtymaqpyz. Odan keıin «Uly dala handary» jáne «Uly dalanyń arýlary» degen toptamalardy josparlap otyrmyz. Onda Tomırıs pen Zarınadan bastap Álııa, Mánshúkterge deıingi tulǵalar qamtylady», - deıdi Memlekettik tildi damytý qorynyń dırektory.
Komıkstiń elektrondy nusqasy arnaıy saıtta tegin usynylǵanymen, úsh tildegi jınaq kitaby satylymǵa shyǵarylady.
«Búgin tusaýy kesilse, erteńnen bastap kitap dúkenderine túsedi. Shamamyz kelgenshe balalar kitaphanalaryna taratamyz. Bul komıksterdiń kóbi Qazaqstannyń kıeli jerlerimen baılanysty. Bir jaǵynan osy kıeli jerlerdi nasıhattaý úshin komıkster jelisimen Aıagóz, Jumbaqtas, Balqash sııaqty kıeli oryndarǵa arnaıy baryp, kórkem fotosýretter túsirip qaıttyq. Jobany Nursultan Nazarbaev qory qarjylandyryp otyr. Aldaǵy toptamalardy osy komıksterdi satýdan túsken aqshamen shyǵarsaq degen oı bar. Sondyqtan da kitaphanalarǵa jappaı tegin tarata almaımyz. Tipti qyzyqqan adam bolsa, Qazcomics.kz saıtyna kirip, tegin tamashalaı alady», - deıdi Azat Sháýeev.
Aıta keteıik, sharaǵa Nursultan Nazarbaev qorynyń dırektory Darıǵa Nazarbaeva qatysyp, shyǵarmashyl qaýymdy qazaq komıksin damytýǵa shaqyrdy.
Darıǵa Nazarbaeva shyǵarmashyl qaýymdy qazaq komıksin damytýǵa shaqyrdy.