Qazaqtyń eki balýany «Álem barysynyń» jartylaı fınalyna ótti

ASTANA. QazAqparat - «Álem barysy-2018» saıysynda jartylaı fınalǵa shyqqan balýandardyń esimderi anyqtaldy. Atalmysh chempıonat Almatydaǵy Balýan Sholaq sport saraıynda ótip jatyr, dep habarlaıdy QazAqparat tilshisi.

Shırek fınaldaǵy alǵashqy beldesý Reseı balýany Roman Bobıkov pen polıak balýany Petr Talachtyń arasynda órbidi. Kórshiles eldiń balýany polıakty tórtinshi mınýtta taza jeńip, qazaq kúresinen sheber ekenin dáleldedi.

Budan keıin boz kilemge tájik balýany Dadahan Kýrbonalıev pen Qazaqstannyń namysyn qorǵap jatqan Ersultan Muzafarov shyqty. Atalmysh beldesýde sportshylar bir-birine laıyqty qarsylas ekenin pash etti. Tájik balýanynyń ańysyn ańdyǵan Ersultan 5 mınýtqa sozylǵan tartysta az ǵana basymdyqpen jeńiske jetti. Aıta ketsek, Ersultan Muzafarov bunyń aldynda ózinen 60 keli artyq ırandyqtan aılasyn asyrǵan bolatyn.

Bul keshte básekege toly qyzý kúresti Mýhsın Hısomıddınov (Ózbekstan) pen Aıbek Nuǵymarov kórsetti. Byltyr da kezdesken qos balýan bir-birin jaqsy biledi. Alaıda Aıbek eki birdeı jartylaı jeńis upaıyna ıe bolyp, ózbek balýanyn úıine qaıtardy.

Shırek fınaldyń sońǵy kezdesýi qazaq balýany Aıbat Seıten men grýzııalyq áıgili Gýram Týshıshvılıdiń arasynda ótti. Aıbat aıqasty jaqsy bastaǵanymen, 1 mınýt 27 sekýndta gúrji balýanynyń aılasyna túsip qaldy.

Osylaısha, Álem barysynyń jartylaı fınalyna Aıbek Nuǵymarov (Qazaqstan), Ersultan Muzafarov (Qazaqstan), Roman Bobıkov (Reseı) pen Gýram Týshıshvılı (Grýzııa) shyǵyp otyr.

Aıta keteıik, Qazaqstan atynan synǵa túsken bes balýannyń ekeýi - Rýslan Ábdirazaqov pen Nurdáýlet Jarylǵapov alǵashqy aınalymda jarys jolynan shyǵyp qalǵan bolatyn. 

Eske sala keteıik, Almatydaǵy Balýan Sholaq atyndaǵy sport saraıynda «Álem barysy» absolıýttik álem chempıonaty ótip jatyr. Chempıonatty «Qazaqstan» jáne «Qazsport» arnasynan tikeleı efırden kórýge bolady.