Qazaqtyń batyry elin qorǵasa, qazaqtyń tóbetteri malyn qorǵaǵan - aqyn Nesipbek Aıtuly (FOTOREPORTAJ)

ASTANA. QazAqparat - Jeksenbi kúni Aqmola oblysy, Arshaly aýdanynyń Jibek joly aýylynda qazaq tazysy men asyl tuqymdy qazaqy tóbetterdiń birinshi respýblıkalyq kórmesi men baıqaýy ótti. Osy bir ultymyzdyń salt-dástúrin qaıta jańǵyrtý jolyndaǵy biregeı is-sharaǵa arnaıy qonaq bolyp, tamashalaǵan aqyn, memlekettik syılyqtyń ıegeri Nesipbek Aıtuly qazaqtyń tazysy men tóbetterin qorǵaý, nasıhattaý maqsatynda ótkizilip otyrǵan baıqaýdyń mańyzdylǵy týraly óz oıymen bólisti.

-Qazaqta «Іlgeri basqannyń ıti ottaıdy» degen maqal bar. Qazaqtyń tazysy men tóbetiniń quryp ketpeýi úshin, aıyryqsha mán berip, osylaı úlken mereke ótkizip, baıqaý uıymdastyryp jatýy bizdiń eldigimizdiń taǵy bir nyshany ǵoı dep oılaımyn. Óıtkeni tarıhtan tamyr tartqan, baýyry bútin el bolǵannan keıin, keshegi babalarymyzdan qalǵan aıshyqty dástúrlerimiz bar. Solardyń qatarynda halqymyz jeti qazynanyń biri dep qasterleıtin ıttiń alatyn orny erekshe. Qazaqtyń tóbeti tóbede jatqan, tazysy tósekte jatqan. Qazaqtyń batyry jaýdyń ótinde júrip, qasyqtap qan tógip elin qorǵasa, qazaqtyń tóbetteri malyn qorǵaǵan. Sondyqtan, haıýan bolsa da bizdiń qazaq ıtke qurmetpen qaraǵan. Bul ıtterdiń basqa tuqymdastaryna uqsamaıtyn artyqshylyqtary kóp. Qazaqy ómirde tazylarymyz saıatshylyqtyń, sal seriliktiń sımvoly bolǵan. Búgingi kúni biz bir kezderi joǵalǵan, álsiregen ulttyq qundylyqtarymyzdy qaıtadan qalyptastyryp, damytýǵa kúsh salyp jatyrmyz. Mine, sonyń bir aıǵaǵy búgingi ótken is-shara dep aıtýymyzǵa bolady. Bul jolda áli de kóp talpynys kerek», - deıdi aqyn Nesipbek Aıtuly.

Baqytjol Kákesh.