Qazaqtyń batyr qyzy Álııa Moldaǵulovanyń týǵanyna 90 jyl
Baıdyń urpaǵy degen syltaýmen qýǵynǵa túsken bolýy kerek, Álııany ákesi inisiniń tárbıesine berip, ózi tyǵylýǵa májbúr bolady. Álııany asyrýyna alǵan aǵasy Áýbákir Moldaǵulov qaryndasynyń on jasynda Áskerı-kólik akademııasyna oqýǵa túskendikten, Máskeýge kóshedi. Birneshe jyldan keıin Akademııa Lenıngrad qalasyna aýystyrylǵan soń, Moldaǵulovtar otbasyna Lenıngradqa barady. Sol kezde 14 jastaǵy Álııa mektep-ınternatta ornalasady. Nemis basqynshylary irgeden bomba jaýdyrǵan 1941 jyldyń maýsymynda Álııa tárbıelenip jatqan otbasy evakýatsııamen kóshiriledi, biraq, Álııa Lenıngradta qalady. Osy jyldyń qyrkúıeginde nemister Lenıngradty qorshaýǵa alǵanda Álııa balalar úıiniń qalǵan tárbıelenýshilerimen ıAroslav aýdanyndaǵy bir aýyla kóshiriledi. Sol aýylda 7-synypty bitirgen soń Álııa avıatsııa tehnıkýmyna oqýǵa túsedi. Albyrt qyzdyń armany - áýede samǵaý edi...Biraq, «mettal óńdeý» mamandyǵyna túsken soń, Álııa úsh aıdan soń ózi soǵysqa surana bastaıdy. Tarıhı qujattarǵa qarasaq, 1942 jyldyń 21 jeltoqsanynda «frontqa attanǵan Álııa Moldaǵulova tehnıkýmnan oqýǵa shyǵaryldy» degen derekti kóz shalady. 1943 jyldyń aqpanynda arnaıy daıyndyq kýrsynan ótken Álııa áskerı Ant qabyldap, 1943 jyldyń shildesinde snaıper retinde soǵysqa shyǵady. Mergen qyzdyń oǵy jaýdyń júzden asa áskerin óltirgen. 1944 jyldyń qaharly qańtarynda (14 qańtar) 19 jastaǵy qyz qandy shaıqastardyń birinde «Otan úshin alǵa!» degen uranmen tutastaı bir dıvızııaǵa rýh bergen mergen qyz erlikpen jan tapsyrady. 1944 jyly maýsymda Álııa Moldaǵulovaǵa Keńes Odaǵynyń Batyry ataǵy beriledi. Aqtóbe, Astana, Almaty, Máskeý, Sankt-Peterbor qalalarynda batyr qyzdyń eskertkishi boı kótergen. Budan ózge, elimiz ben keńester odaǵyna kirgen elderde ondaǵan kóshege, mektepter men kemelerge batyr Álııanyń aty berilgen.