Qazaqtyń ánderin radıo arqyly tyńdadym - Koreıanyń birinshi xanymy
"Qazaq pen káris tilderi Altaı tobyna jatatynyn bilemin. Ókinishke qaraı, qazaq tilin úırengen joqpyn. Sol úshin taǵy bir márte keshirim suraımyn. Qazaq jastary káris mýzykasyn unatady dep estigenmin. Búgin men de tań ata radıo arqyly qazaqtyń tanymal ánderin tyńdadym. Sózin túsinbedim. Biraq ánderdiń áýeni óte kóńildi, adamǵa kádimgideı energııa beredi eken. Men úshin bul - jańa tájirıbe, jańa tanym", - dedi Kım Chjon Sýk Nazarbaev Ýnıversıtetiniń stýdentterimen bolǵan kezdesýde.
Osy oraıda Koreıanyń birinshi xanymy K-pop ónerine qyzyǵyp júrgen jastardyń eki eldiń mádenı baılanystaryn kúsheıtetinine senim bildirdi. "Sizder Qazaqstan men Koreıa arasyndaǵy kópir ispetti mádenı baılanystardy kúsheıte alasyzdar. Sizder Koreıanyń mádenıetin osynshama jaqsy túsinseńizder, káris tilin de úırene alasyzdar. Sonda biz bárimiz birige alamyz. Raqmet sizderge! ", - dedi Kım Chjon Sýk.
Aıta keteıik, búgin Koreıanyń birinshi xanymy Kım Chjon Sýk Nazarbaev Ýnıversıtetin aralap, stýdent jastarmen kezdesti. Oǵan allymen ýnıversıtette qurylǵan K-pop klýbyna múshe jastardyń óneri tanystyryldy. Klýb jetekshisi Aıym Daýylbekovanyń aıtýynsha, bıyl klýbtyń qurylǵanyna bes jyl tolyp otyr. Osyǵan oraı, kontsert te uıymdastyrylǵan bolatyn. Al Koreıanyń mádenı ortalyǵy qoldaý jasap otyrady. "Búginde bizdiń klýbymyzǵa 45 adam kiredi. Barlyǵy - Nazarbaev Ýnıversıtetiniń stýdentteri. Magıstranttar da bar. Aptasyna tórt ret jattyǵyp otyramyz. Alaıda kontsertterdiń aldynda kúnde daıyndalamyz. Resmı ataýymyz - "NU Kpop cover dance club". Al toptyń ataýy - "Yeoboseyo". Osy atpen san alýan jarystarǵa qatysyp otyramyz. Buǵan deıin tek ýnıversıtet aıasynda ǵana óner kórsettik. Al byltyr Chanvon festıvaline qatystyq. Bıyl da shaqyryp jatyr"- dedi A.Daýylbekova QazAqparat tilshisine bergen suxbatynda.
Koreıanyń birinshi xanymyna "Yeoboseyo" tobynyń óneri unap qaldy. Tipti, ózimen birge tanymal K-pop ártisterin alyp kelmegenine de ókinip qaldy. "Sizdermen tanysqanyma óte qýanyshtymyn. K-pop ónerin unatatyndaryńyz bıden kórinip tur. Sol úshin alǵysymdy aıtamyn. Ózimen birge Koreıanyń tanymal K-pop bıshilerin alyp kelý kerek edi. Ókinishke qaraı, shyqpaı qaldy. Sol úshin keshirim suraımyn. Kelesi joly mindetti túrde alyp kelýge tyrysamyn", - dep atap kórsetti Kım Chjon Sýk.