Qazaqtyń ulttyq kıimine álem kóz tigip otyr – Dınara Sátjan

<p>ASTANA. KAZINFORM &ndash; Dinara SATZHAN brendiniń negizin qalaýshy Dınara Sátjan 14 jyl boıy ulttyq kıimdi álemge pash etý jolynda eńbektenip júr. Nátıje joq emes. Búginde onyń usynǵan sapaly kıimderine qazaqstandyqtar ǵana emes, sheteldikter de qyzyǵýshylyq tanytyp otyr.</p>

Sulýlyqqa jany qushtar jan kıimdegi ár elementti súzgiden ótkizip, erekshe ári sapaly ónimdi jurt nazaryna usynýǵa asyq. 

– Óz basym 14 jyl boıy qazaq ulttyq brendin damytyp kelemin. Bul meniń áý bastaǵy maqsatym, adal nıetim. Eshkimniń kómeginsiz-aq joǵary nátıjelerge qol jetkizdim dep nyq senimmen aıta alamyn. Sapaly ári ádemi kıim árqashan suranysqa ıe. Tutynýshylardyń talaby men tilegi de eskeriledi. Meniń dúkenimde ár kóılek zamanaýı stılde bolsa da, ulttyq elementter qamtylǵan, – deıdi Dınara Sátjan.

Agenttik tilshisine bergen jaýabynda ol sońǵy kezde ulttyq elementter bar kıimderge suranys ájeptáýir artqanyn aıtady.

Foto: Dınara Sátjannyń jeke muraǵatynan

– Meniń dosym Beıbit Álibekov rý aty jazylǵan jeńil jeıdelerdi satyp jatyr. Suranys óte kóp. Ulttyq kıim Qazaqstanda ǵana emes, álemde trendke aınalyp jatyr deýge tolyq negiz bar. Mysaly tanymal brend Louis Vuitton óz dúkenin qazaq úı qylyp saldy, – deıdi ol.

Ulttyq stıldegi fashion-festıvalderdiń basy-qasynda júretin Dınara Sátjan otandyq dızaınerlerdiń áleýetin oń baǵalady.

Onyń aıtýynsha, ulttyq kıim arqyly ulttyq rýhty arttyrý azdyq etedi.

– Ulttyq rýhty oıatý úshin ulttyq ıdeologııa qajet. Sodan keıin materıaldyq jaǵdaıdy jaqsartý kerek. Sodan keıin ǵana mádenıet, óner, ulttyq kıim… Ne desek te, ulttyq kıimdi damytýdaǵy eńbegimiz urpaq tárbıesine oń áser etip jatqany anyq, – deıdi Dınara Sátjan.