Qazaqtyń batyrlaryn somdasam deımin — kerekýlik akter bala
Halyqaralyq balalardy qorǵaý kúninde ónerpaz jasóspirimdi áńgimege tarttyq.
Ǵazız Atyǵaevtyń jasy 10-da, bıyl Baýyrjan Momyshuly atyndaǵy orta mekteptiń 5-synybyn támamdady.
Aıtýynsha, teatrdaǵy alǵashqy rólin nebári 6 jasynda, «Bir túp alma aǵashyndaǵy» Maqsattyń kishkene shaǵyn somdaǵan.
Keıin teatr sahnasynda qoıylǵan «Ana-Jer Ana», «Ábilmansur-Sabalaq-Abylaı», «Tasjúrek», «Ujdan», «Kerbez kelinder» qoıylymdarynda balalardyń rólderinde kórdik.
— Úıde tórt balanyń úshinshisimin, jalǵyz ulmyn. Anam osy teatrda eńbek etedi, kishkene shaǵymnan onymen birge jumysyna jıi kelip, akter aǵaı-apaılardyń daıyndyqtaryn tamashalaǵandy jaqsy kóretinmin. Birde maǵan «Bir túp alma aǵashynyń» qoıýshy rejısseri kishkentaı Maqsattyń rólin oınap kórshi dedi. Aıtqandaryn jasap edim, aǵaıǵa unaǵan sııaqty. Sóıtip sahnaǵa shyǵardy. Keıin basqa da rólderdi oınadym. Daıyndyq barysynda talaı qyzyqtar bolyp turady. Jaqynda «Rıchard ІІІ» spektaklinde Iork jáne Klarensti somdap, daıyndyq kezinde tosyn jaǵdaı boldy. Bir aǵaıdyń oıyn barysynda ústel ústindegi ydysty laqtyratyn jeri bar. Sony sermep qalǵanda kózimniń aldynan zý etip óte shyqty. Meni barlyǵy erkeletedi, óskende bizden asqan akter bolasyń dep arqamnan qaǵyp jatady. Maǵan sahnaǵa shyǵyp, túrli rólderdi somdaǵan unaıdy, -dep teatrdaǵy áserin bólisti jas talant.
Ótken jyly Aımaýytov atyndaǵy oblystyq qazaq-mýzyka teatry Máskeýde ótken halyqaralyq festıvalge qatysqanda Ǵazız trýppamen birge saparlap, «Ujdan» áfsanasynda bala rólin somdady.
Máskeýde Júsipbek Aımaýytov jerlengen zıratqa barǵanyn, onda jerlengen Alash arystarynyń basyna gúl shoǵyn qoıǵanyn jetkizdi.
— Kishkene shaǵymda «Shańyraq» ortalyǵynda úıirmege qatysyp, ertegi keıipkerlerin somdaıtynmyn. Odan soń anammen aqyldasyp Qurmanǵazy atyndaǵy mýzyka mektebinde vıolonchel synybyna oqýǵa tústim. Mektepten tys ýaqytta sonda baramyn. Al ótken jyly Pavlodar qalasynda túsirilgen «Igra s nýlevoı stavkoı» fılmindegi epızodta oınadym, — deıdi ol.
Jýyqta Pavlodarǵa Almatydan M.Áýezov teatry kelgende teatr trýppasynda bala jetpeı, Mansur ózge balalarmen birge birneshe qoıylymǵa qatysypty.
Ádette kınodan ǵana kóretin juldyzdarmen bir sahnada oınap, olardan úlken sabaq alǵanyn aıtady.
Ǵazız bos ýaqytynda Ańsar, Mansur, Muzafar, Aqyljan esimdi dostarymen dop teýip, fýtbol oınasa, demalys kúnderi ákesimen «Ertis» fýtbol klýbynyń kezdesýlerin tamashalaıdy.
Teatrdaǵy akterlik ónerin ári qaraı shyńdap, bolashaqta akterlik oqýǵa tússem degen úlken maqsaty da bar.
Áńgime sońynda qazaq kınolaryn, sonyń ishinde tarıhı kartınalardy súıip kóretinin aıtty.
Óskende sondaı tarıhı kınolarǵa tússem, qazaqtyń belgili han-batyrlaryn somdasam degen asqaq armany bar.