«Qazaqtelekom» serıal naryǵyna kirmekshi

ASTANA. QazAqparat – «Qazaqtelekom» AQ basqarma tóraǵasy Qýanyshbek Esekeev ulttyq kompanııanyń 2022 jylǵy jumysy talqylanǵan qoǵamdyq keńes otyrysynda «Salem social media»-nyń ulttyq kompanııa quramyna kiretini týraly málimetterge jaýap berdi, dep habarlaıdy QazAqparat tilshisi.

«Áleýmettik jelide medıa-kontent óndirýshi «Salem social media» kompanııasy «Qazaqtelekom» ıeligine ótedi degen málimet tarap jatyr. Bul shyn ba? «Qazaqtelekom» udaıy ózine tán emes qyzmet túrlerin qysqartyp kele jatqanyn eskersek, mundaı bastama qanshalyqty tıimdi?», - dep surady qoǵamdyq keńes ókili.

Ulttyq kompanııa basshysynyń aıtýynsha, mundaı jobalar álemdik tájirıbede tıimdiligin kórsetip otyr.

«Qazirgi operatorlar zamanaýı tásilmen jumys isteıdi. Bir ǵana keısti alaıyq. NVO kabeldik operatory men «Taqtalas» jobasynyń jarqyn mysaly bar. «Taqtalasty» túsirip, iri kontent óndirýshige aınaldy. Aýdıtorııanyń adaldyǵy úshin iri operatorlar óz kontentin óndirýge kóship jatyr. Mysaly, reseılik «MTS» KION-ǵa ıelik etedi. KION degenimiz – kontent saýdasynda deldal ǵana bolyp qana qoımaı ózi de kontent óndiretin medıa-portal. Al Start «Megafonnyń» ıeliginde. Start «Megafonnyń» kollaboratsııalyq servısteriniń biri bolyp esepteledi», - dedi ol.

Osy tájirıbeni eskergen «Qazaqtelekom» jańa serıal túsirýdi bastap ketken kórinedi.

«Al bizdiń «Salem social media»-men aramyzda pılottyq stsenarıı bar. Qazir biz «Chernyı dvor» degen serıal túsirip jatyrmyz. Úlken jarnama júrip jatyr. Osy kollaboratsııalyq saıasattyń arqasynda, óz kontentimizdi óndirgenniń arqasynda aýdıtorııamyz ósip kele jatqanyn kórip otyrmyz. Mundaı ózara is-qımyl bizge aýdıtorııamyzdyń adaldyǵyn qalyptastyrýǵa múmkindik beredi dep oılaımyz. Al kontent óndirýshi tarapqa bul óz kontentin keńirek taratýǵa jol ashady. Sondyqtan ózge operatorlardyń tájirıbesine biz de kelip otyrmyz. «Salem social media»-ny tańdaǵanymyz, bul eldegi iri stýdııalardyń biri. Biz qazir kelissóz satysynda turmyz. Zań turǵysynan qalaı ózara is-qımyl jasaıtynymyzdy anyqtap alýymyz kerek. Alǵashqy jobamyz óte sátti shyqty. Alǵashqy 4 serııanyń ózi 20 myń abonent ákelip, 50 myń belsendi qoldanýshyny kórermen ete aldy. Biz osyndaı shaǵyn qadamdardyń kómegimen medıasaıasatymyzdy jolǵa qoıamyz. Óıtkeni qolymyzda aýqymdy kontent taratatyn arna bar. Sondaı-aq, biz 2 myńda gollıvýd kınosyn qazaq tilinde usynyp otyrmyz», - dedi Qýanyshbek Esekeev.