«Qazaqtelekom» quramynan bir uıaly baılanys operatoryn shyǵarý máselesi talqylanyp jatyr

<p>Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıteti tóraǵasynyń orynbasary Gúlnar Bókeeva &laquo;Qazaqtelekom&raquo; quramynan bir uıaly baılanys operatoryn shyǵarý múmkindigine qatysty túsinik berdi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Qazir «Qazaqtelekom» kompanııasynyń quramynda eki uıaly (Kcell/Activ jáne «Mobaıl Telekom-Servıs (Tele2/Altel)») baılanys operatory bar.

«Kompanııa quramynan bir operatordy naryqqa shyǵarý boıynsha jumystar «Samuryq-Qazyna» sheshimine baılanysty. Osy máseleni bizdiń mınıstrlik atalǵan qormen birlese pysyqtap jatyr. Ázirge, qazir qaı operator satýǵa qoıylyp, naryqqa shyǵatyny belgisiz», - dedi G. Bókeeva elordada ótken baspasóz máslıhatynda.

Sonymen qatar vedomstvo ókili uıaly baılanys naryǵynyń basym úlesi «Qazaqtelekom» quramyndaǵy kompanııalarǵa tıesili ekenin aıtty.

«Dál qazir osy kompanııa quramynan uıaly baılanys operatory qashan shyǵatynyn naqty aıta almaımyz», - dedi komıtet tóraǵasynyń orynbasary.

Budan buryn habarlanǵandaı, bıyl tamyz aıynda Tsıfrlyq damý, ınnovatsııalar jáne aeroǵarysh ónerkásibi mınıstrliginiń Telekommýnıkatsııa komıtetiniń tóraǵasy Erjan Meıramov «Qazaqtelekom» quramyndaǵy qaı uıaly baılanys operatory shyǵýy múmkin ekenin aıtty.