«Qazaqtelekom» Kcell-di satyp alý máselesine qatysty pikir bildirdi

ASTANA. QazAqparat - «Qazaqtelekom» AQ «Kcell» AQ-pen jasasqan mámilesine qatysty Qazaqstan Respýblıkasy Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń sheshimine pikir bildirdi, dep habarlaıdy QazAqparat.

Eske sala keteıik, monopolııaǵa qarsy organ «Qazaqtelekom» AQ-nyń «Kcell» AQ aktsııalarynyń 75 paıyzyn satyp alý týraly ótinishhatyn qarap, mámileni júzege asyrýǵa ruqsat bergen bolatyn.

Osy sheshimge pikir bildire otyryp, «Qazaqtelekom» AQ basqarma tóraǵasy Qýanyshbek Esekeev «Qazaqtelekom» retteýshiniń jáne basqa da seriktesterdiń talaptaryn óte qurmetteıtinin jetkizdi.

«Biz bıznes jaıly bolýy qajet dep sanaımyz ári óz tehnologııalarymyzǵa senimdimiz. Básekelesimizdiń de jaqsy sharttarǵa qol jetkizýi biz úshin mańyzdy. Sondyqtan osy ótinishterdiń, retteýshimen birge istelgen istiń barlyǵy osy mámileni iske asyrýdyń mańyzdy bóligi. Sondyqtan biz barynsha ashyq boldyq ári bizge qoıylatyn qolaısyz suraqtardyń eshbirin aınalyp ótken joqpyz», - dedi Qazaqtelekom basshysy.

Jurt tarıfterdiń joǵarylaýyn boljap, abyrjı bastaǵany belgili. Qýanyshbek Esekeev bul abyrjý negizsiz ekenin jetkizdi.

«Biz tehnologııalardy biriktirý arqyly tarıfterdi kóteremiz dep oılamaımyn. Ondaıda bizdiń tehnologııalardy damytýǵa jumsaıtyn shyǵynymyz az bolady», - dedi Q. Esekeev.

Aıta keteıik, memlekettik retteýshi organnyń mámileni maquldaýy onyń jasalǵanyn bildirmeıdi. Usynylǵan sharttardy búkil protsess boıyna Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti men QR Aqparat mınıstrligi qadaǵalap otyrady.