Qazaqtelekom basshysy elimizde kıbersport úshin jaqsy jaǵdaı jasamaq

NUR-SULTAN. QazAqparat – «Qazaqtelekom» AQ basqarmasynyń tóraǵasy Qýanyshbek Esekeev elimizde kıbersportty damytý úshin qolaıly jaǵdaı jasaýǵa ýáde berdi, dep habarlaıdy QazAqparat tilshisi.

«Bul belgili problema. CS ornalastyrylǵan Valvo-nyń naqty serveri Stokgolmde. Sondyqtan oıynshylarymyzǵa elimizde otyryp serverde onlaın oıyn oınaý qıyndaý. Qazirgi ýaqytta oıynshylarymyz úshin kidiristiń eń tómen deńgeıin berý úshin ashyq arnany testilep jatyrmyz. Ázirshe bul problema naqty sheshilmegen. Sondyqtan kıbersporty komandalarynyń negizgi bóligi Kıevte jattyǵady. Kelesi jyly tehnıkalyq sıpattamamyz jaqsaratyn bolsa, onda barlyq komandalardy osy jaqqa kóshirý josparlanyp otyr», - dedi ol búgin Úkimet úıindegi baspasóz máslıhatynda.

Onyń atap ótýinshe, bul tek Qazaqtelekom kompanııasyna ǵana emes serverlerge de baılanysty jaıt.

«Máselen, Warface bizdiń serverlerimizdi ornalastyrǵan jáne onda esh problema joq. Degenmen, keıbir oıyn óndirýshiler serverlerin osy jerge ákelýge daıyn emes. Sondyqtan qajetti serverlerge baratyn arnalardy qarastyryp jatyrmyz. Biraq, bul CS pen Dota 2-ge qatysty», - dedi Qýanyshbek Esekeev.