«Qazaqtelekom» aýyldardy jyldamdyǵy joǵary ınternetke belsendi túrde qosýdy jalǵastyrýda

Elimizdiń eń iri baılanys operatory aýyldarda jelini damytýdy jalǵastyrýda. «Qazaqtelekom» Batys Qazaqstan oblysynda taǵy bir bazalyq stantsııa salyp, osynyń arqasynda Oral qalasynan 320 km jerdegi 1200-ge jýyq turǵyny bar aýyl endi udaıy «jeli aıasynda» bolady.

Qaraqamys – jyl basynan beri BQO-da jyldamdyǵy joǵary ınternetke qosylǵan besinshi aýyl. «Qazaqtelekom» aýylda «radıokópir» tehnologııasy boıynsha jeliler saldy. Bunyń sapasy EVDO tehnologııasyna qaraǵanda telekommýnıkatsııa qyzmetin múldem basqasha kórsetedi. Aýyl turǵyndary bul tehnologııadaǵy ınternetti 12 jyldan beri paıdalanyp kelgen. Qazir turǵyndar barlyq zamanaýı telekommýnıkatsııa qyzmetterin belsendi paıdalanýda: onlaın oqý, jumys, beıneqońyraý jáne t. b.

«Radıokópir» tehnologııasy arqyly jelilik qurylys jobasyna qosylatyn aýyldar tizbesi mynadaı krıterııler boıynsha qalyptasady: oblys ortalyǵynan, qaladan shalǵaı ornalasqan, bilim jáne medıtsına uıymy bolýy tıis, halyq sany da eskeriledi», - dedi «Qazaqtelekom» AQ bólshek bıznes Dıvızıonynyń aımaqtyq qyzmet kórsetý jáne satý menedjeri Baqytjan Nııazov.

Qaraqamystyqtardyń negizgi kásibi – mal sharýashylyǵy. Aýylda 26 sharýa qojalyǵy bar: iri qara, usaq mal ustaıdy. Sonyń biriniń basshysy Amangeldi Myrzaǵalı ınternettiń arqasynda salyq esepterin tapsyrý áldeqaıda jeńildegenin, aı saıyn ortalyqqa sabylýdyń qajeti joq ekenin aıtady. 55 jastaǵy kásipker gadjetter arqyly qujattardy memlekettik organdarǵa jiberedi.

«Qazir ınternet arqyly sıyrǵa qajetti barlyq veterınarııa preparattaryna tapsyrys bere alamyn. Internet bizge qanshalyqty qajet ekenin endi túsingen shyǵarsyz? Ol bizge ǵana emes, mektepterge, aýrýhanalarǵa da kerek. Osyndaı múmkindik bergen «Qazaqtelekomǵa» rahmet», – dedi Amangeldi aǵa.

Aýylda sonymen qatar eki mektep, eki Mádenıet úıi, balabaqsha, eki kitaphana, dárigerlik ambýlatorııa, feldsherlik pýnkt bar. Aýyl ákimi Samǵat Zeınýllınniń aıtýynsha, bazalyq stantsııa turǵyndar úshin jańa múmkindik ashty.

«Buryn aýylda ınternet jyldamdyǵy óte tómen edi. Endi turǵyndar memlekettik qyzmetti onlaın alyp, oqyp, jaqyndarymen baılanysa alady», – deıdi S. Zeınýllın.

Jyl sońyna deıin «Qazaqtelekom» BQO-da taǵy úsh aýylǵa – Qoskól, Aqoba jáne Qosobada bazalyq stantsııalardy iske qosýdy josparlaýda. Al aýylǵa symsyz jelini engizý kompanııanyń 2018-2020 jyldary shet aımaqtarda talshyqty-optıkaly baılanys jelilerin salý jobasyn júzege asyrǵan soń múmkin boldy.