«Qazaqtelekom» 5G ornatý úshin bıýdjetke 156 mlrd teńge tóledi

«Qazaqtelekom» AQ-nyń baılanys quraldaryn satyp alýǵa jumsaǵan shyǵyndarynyń mólsheri ótken jylǵa qaraǵanda 2 ese ósken, dep habarlaıdy QazAqparat tilshisi.

«Bizdiń kompanııa 5G uıaly baılanysyn ornatýda radıojıilikter úshin memlekettik bıýdjetke 156 mlrd teńge tóledi. Bul bizdiń enshiles kompanııalarymyzǵa el aýmaǵynda túbegeıli jańa ınfraqurylymdyq jeli qurýǵa múmkindik beredi. Jelini ınvestıtsııalaý - kompanııanyń bolashaq paıdasyna salynǵan qarajat. Bıyl baılanys quraldaryn satyp alýǵa jumsalatyn shyǵyndardyń mólsheri ótken jylmen salystyrǵanda 2 ese kóp. Birneshe jyldan beri jalǵasyp kele jatqan qarjylyq kórsetkishterdiń turaqty ósýi bizge jańa jobalardy iske asyrýǵa jáne negizgi aktıvterdi jańǵyrtýǵa múmkindik beredi», - dedi «Qazaqtelekom» AQ bas qarjy dırektory Lıýdmıla Atamuratova atalǵan kompanııanyń 6 aılyq jumysyn qorytyndylaýǵa arnalǵan jıynda.

Onyń aıtýynsha, jyl qorytyndysy boıynsha kompanııanyń jalpy tabysy 670-690 mlrd teńgege jetedi dep boljanýda. Byltyr kompanııa kirisi 635 mlrd teńgeni quraǵan.

«Shyǵyndardyń eleýli ósýine qaramastan, kompanııanyń qarjylyq turaqtylyǵynyń kórsetkishi bıyl 6 aı qorytyndysy boıynsha jaqsardy. Menshikti kapıtal araqatynasy ótken jylmen salystyrǵanda 21% jáne 24%-ǵa tómendedi. Taza qaryz 2023 jyldyń 1 jartyjyldyǵy boıynsha shoǵyrlandyrylǵan negizde 0,66 quraıdy», - deıdi ol.