«Qazaqtaný» jobasyn júzege asyrý merzimi anyqtaldy

  ASTANA. QazAqparat - Qazaqstan halqy Assambleıasy tóraǵasynyń orynbasary - Hatshylyq meńgerýshisi Leonıd Prokopenko «Qazaqtaný» jobasy týraly aıtyp berdi, dep habarlaıdy QazAqparat.

Búgin Astanadaǵy QR Ulttyq akademııalyq kitaphanasynda QHA Ǵylymı-sarapshylyq keńesiniń keńeıtilgen otyrysy ótti. Jıyn barysynda QHA-nyń XXVI sessııasynyń tapsyrmalaryn oryndaý máseleleri talqylandy.

Osy oraıda QHA-nyń XXVI sessııasynda usynylǵan jańa jobaǵa toqtalǵan L.Prokopenko «Ǵylymı-tanymdyq «Qazaqtaný» jobasy - qazaq mádenıetin, tarıhyn, fılosofııasyn, sondaı-aq qazaq halqynyń qundylyqtaryn barlyq qazaqstandyq etnostar arasynda dáripteýge arnalǵan. Jobaǵa erekshe ról belgilenip otyr, ıaǵnı biryńǵaı qundylyqtardy qalyptastyrý eskerilgen», - dedi.

Sondyqtan bıylǵy maýsym aıynda Aqmola oblysynda atalǵan joba resmı túrde iske qosylady.

«Ǵylymı baǵytta maǵyna bermeı, bul jobany júzege asyrý múmkin emes. QHA kafedralary bazasynda ony iske asyrý úshin tıisti alańdardy qurý kerek», - dedi Leonıd Prokopenko.

Budan buryn habarlanǵandaı, QHA-nyń XXVI sessııasynda «Qazaqtaný» atty jańa jobany júzege asyrý usynylǵan bolatyn. 

«Rýhanı jańǵyrý» baǵdarlamasy qazaq halqynyń rýhanı ásemdigi men ishki jan dúnıesi tereńdiginiń barsha keńistigin kórsetti. Dáýirler tirilip, eskertkishter sóıledi. Qazaq halqynyń danalyǵy biryńǵaı halyqty baılanystyrýshy negiz bolyp otyr. Assambleıa «Qazaqtaný» jańa jobasyn usyndy. Bul óz kezeginde barsha qazaqstandyqtarǵa qazaq mádenıetiniń, tarıhynyń, fılosofııasynyń biriktirýshi kúshi - qazaq halqynyń qundylyqtary jóninde túsinik berý úshin jasalýda», - dedi Assambleıa múshesi, Shymkent Oqýshylar saraıynyń dırektory Natalıa Romanova.