Qazaqta ólim jazasynyń ornyna «qun tóleý» bolǵan - Jemis Turmaǵambetova
«Memleket basshysy Qasym-Jomart Toqaevtyń Jarlyǵymen elimizde ólim jazasynyń kúshi joıyldy. Budan bólek, Qylmystyq kodeks, Qylmystyq is júrgizý kodeksi men Qylmystyq atqarý kodeksterine túzetýler engizile bastady. Men osyny Prezıdent Toqaevtyń gýmanıtarlyq aktisi jáne gýmanıtarlyq mıssııasy dep aıtar edim. Sondaı-aq sońǵy jyldary elimizde ólim jazasy túrinde jazaǵa ákelýi múmkin qylmystardyń sany azaıǵanyn erekshe atap óter jaıt. Jalpy men 1995 jyldan beri Qazaqstannyń Ólim jazasynyń kúshin joıýǵa baǵyttalǵan azamattyq jáne saıası quqyqtar týraly halyqaralyq paktiniń ekinshi fakýltatıvtik hattamasyna qosylý jáne elimizde ólim jazasyn joıý máselesimen aınalysyp kelemin», - dedi spıker.
Ol sondaı-aq qazaq halqynyń tarıhynda ólim jazasy bolmaǵanyn aıtty.
«Halqymyzda ólim jazasynyń ornyna «qun tóleý» jazasy bolǵan. Mysaly, kisi óltirgen kináli adam bolsa, oǵan halqymyz ólim jazasyn kespegen. Biraq, sol óltirilgen kisiniń qunyn álgi kináli adamǵa tóletken. Osylaısha dana halqymyz ólim jazasymen máseleniń túbegeıli sheshimin tappaıtynyn jaqsy túsingen», - dedi Jemis Turmaǵambetova.
Sonymen qatar «Adam quqyǵyna arnalǵan hartııa» qoǵamdyq qorynyń dırektory qazaqstandyqtardy aldaǵy respýblıkalyq referendýmǵa bir kisideı qatysyp, daýys berýge shaqyrdy.
«Referendýmnan soń zańymyzǵa ózgerister engiziledi. Ol elimizdiń ár azamaty úshin mańyzdy oqıǵa. Sondyqtan árbir azamat óz ómiri men el taǵdyryna beı-jaı qaramaı, referendýmǵa baryp, óz daýysyn bergenin durys dep sanaımyn», - dedi ol.