Qazaqstannyń júk tasymaly erejesin buzǵandar 130 mln teńge aıyppul tóledi

ASTANA. QazAqparat - Qazaqstannyń júk tasymaly erejelerin buzǵandar aǵymdaǵy jyldyń 11 aıynda 130 mln teńge kóleminde aıyppul tóledi. Bul týraly búgin QR Parlamenti Májilisiniń jalpy otyrysynda elimizdiń Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.

Otyrys barysynda mınıstr «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy Halyqaralyq avtomobıl qatynasy týraly kelisimdi ratıfıkatsııalaý týraly» QR Zańynyń jobasyn tanystyrǵan bolatyn.

 «Kelisimniń 7-babyna sáıkes júkterdi tasymaldaýǵa ruqsat berý 3 túrde júzege asyrylady. Bul eki jaqty tranzıttik, sondaı-aq úshinshi memleketterden tasymaldaý. Osyǵan baılanysty meniń suraǵym bar. Osy zattyń bir túrimen basqa tasymaldar júzege asyrylyp ketpeı me? Bul salany qalaı baqylaımyz?», - dep surady osy rette Májilis depýtaty Amangeldi Dáýrenbaev mınıstrden.

Óz kezeginde Jeńis Qasymbek bul máselede  Ázerbaıjanmen jáne basqa da shekaralas memlekettermen bir qaǵıdat boıynsha jumys isteıtindikterin atap ótti.

«Bizde oblystarda arnaıy kólik ınspektsııalary jumys isteıdi. Osy mekemeler atalǵan máseleni baqylaýda ustaıdy. Iá, siz aıtqan jaǵdaılar bolady. Shekaralas memleketterden tasymaldaýshylar el aýmaǵyna kirip, tasymal jasaıdy. Ótken 11 aıdyń ishinde 1 500 júkti tasymaldaý barysynda zań buzýshylyqtar bolǵan. Zańdy buzǵan tasymaldaýshylar 120-130 mln  aıyppuldy memleketke tóledi. Bul másele boıynsha kózqarasymyz erekshe,  arnaıy baqylaý jasap jatyrmyz. Sońǵy kezderi osyndaı zań buzýshylyqtar azaıýda», - dedi mınıstr.